Árbók Háskóla Íslands 1999 - Háskóli Íslands

innslætti á notkunardæmum í ritmálssafni stofnunarinnar. Þannig var unnt að
ráða sumarfólk og á árinu öllu voru slegnir inn á þriðja hundrað þúsund seðlar.
Áður hafði stofnunin fengið veglega styrki úr sjóðnum en án þeirra hefði seint
verið ráðist í þetta mikla verk. Ætlunin er að ljúka því um mitt ár 2001.
Um nokkurt skeið hefur verið unnið að íslenskum stofni íslensk-norrænnar orðabókar.
Í lok árs 1998 fékkst til hans styrkur frá Norræna menningarsjóðnum og
einnig styrkti Norrænt málráð hann. Samstarf hefur tekist við Institutionen för
svenska språket í Gautaborg um gerð íslensk-sænskrar orðabókar. Orðabók Háskólans
hefur haft margvíslegt gagn af þeirri vinnu sem lögð hefur verið í grunninn.
Fjórða ritið í röðinni Orðfræðirit fyrri alda kom út á árinu. Það var Lexicon Islandicum
eftir Guðmund Andrésson sem fyrst var gefið út í Kaupmannahöfn 1683. Ritstjóri
var Gunnlaugur Ingólfsson orðabókarritstjóri og skrifaði hann einnig ítarlegan
inngang. Ritið hefur málsögulegt og orðfræðilegt gildi en það er ein fyrsta
orðabókin sem gefin var út fyrir íslenskt mál. Orðskýringar eru á latínu.
Meðal rannsóknarverkefna einstakra starfsmanna má nefna að Ásta Svavarsdóttir
og Guðrún Kvaran unnu saman að athugun á erlendum áhrifum á íslenskan
orðaforða á tímabilinu 1930–1980. Því verki er að mestu lokið og verða birtar
greinar um niðurstöðurnar á næsta ári. Guðrún Kvaran vann að gerð handbókar
um íslenska beygingar- og orðmyndunarfræði á vegum Lýðveldissjóðs og er það
verk langt komið. Jón Hilmar Jónsson vinnur að íslenskri hugtakabók og fór í
rannsóknaleyfi 1. ágúst til að vinna að framgangi hennar.
Rannsóknasetur
Háskóla Íslands
í Vestmannaeyjum
Rannsóknasetrið í Vestmannaeyjum starfar á vegum samstarfsnefndar Háskóla
Íslands og Vestmannaeyjabæjar sem var sett á stofn með skipunarbréfi Sveinbjörns
Björnssonar háskólarektors og Guðjóns Hjörleifssonar bæjarstjóra, dags.
14. ágúst 1994. Nefndin náði því fimmta starfsári á síðasta ári og í tilefni af þeim
tímamótum voru óháðir aðilar fengnir til að gera úttekt á starfinu þessi fyrstu ár.
Úttektin var framkvæmd af Davíð Bjarnasyni og Erlu Hlín Hjálmarsdóttur og var
hún kynnt á afmælishátíð nefndarinnar sem haldin var í Eyjum þann 15. október
1999.
Stjórn og starfsfólk
Í stjórn Samstarfsnefndar Háskóla Íslands og Vestmannaeyjabæjar voru upphaflega
skipaðir ótímabundið fulltrúar frá Vestmannaeyjabæ, Háskóla Íslands, Rannsóknastofnun
fiskiðnaðarins í Vestmannaeyjum (RFV), útibúi Hafrannsóknastofnunar
í Vestmannaeyjum og fiskvinnslu og útgerð í Vestmannaeyjum. Í stjórninni
sátu á árinu: Þorsteinn I. Sigfússon prófessor (stjórnarformaður, fulltrúi háskólaráðs),
Guðjón Hjörleifsson bæjarstjóri (gjaldkeri, fulltrúi Vestmannaeyjabæjar),
Gísli Már Gíslason prófessor (fulltrúi Líffræðistofnunar), Gísli Pálsson, prófessor
(fulltrúi Sjávarútvegsstofnunar), Hafsteinn Guðfinnsson, forstöðumaður (fulltrúi
Hafrannsóknastofnunar), Sighvatur Bjarnason forstjóri (fulltrúi fiskiðnaðarins í
Vestmannaeyjum), Sigmar Hjartarson, forstöðumaður (fulltrúi RFV). Hafró og RFV
hafa farið með eitt atkvæði í stjórninni saman.
Þorsteinn I. Sigfússon, Gísli Pálsson og Gísli Már Gíslason fara með málefni háskóladeildarinnar
í Eyjum.
Stofnanir innan setursins eru fimm og hafa á að skipa um fjórtán starfsmönnum
sem eru ýmist í verkefnatengdri vinnu eða fastráðnir forstöðumenn, sérfræðingar,
eða almennir starfsmenn viðkomandi stofnanna. Forstöðumaður Rannsóknasetursins
er Páll Marvin Jónsson en hann er jafnframt útibússtjóri háskóladeildarinnar
sem er skipuð eftirfarandi starfsmönnum auk Páls: Georg Skæringsson
(tæknimaður); Guðrún Karitas Garðarsdóttir (ritari); Sigrún Jónbjarnardóttir (sérfræðingur);
Sigurbjörg Vilhjálmsdóttir (ræsting); Hans Aðalsteinsson (verkefnastjóri
Athafnaversins).
97