Árbók Háskóla Íslands 1999 - Háskóli Íslands

Heimsóknir erlendra aðila
Fjölmargir erlendir gestir frá 21 stofnun í 11 þjóðlöndum sóttu Alþjóðaskrifstofuna
heim í þeim tilgangi að fræðast um starfsemi Háskóla Íslands, um háskólamenntun
á Íslandi almennt og til að kynna þá háskóla sem þeir starfa við. Oft eru
þessar heimsóknir upphafið að tvíhliða samstarfi íslenskra háskóla við viðkomandi
aðila.
Kynningarstarf
Alþjóðaskrifstofan fær styrk frá Evrópusambandinu til að standa straum af kostnaði
við kynningu á Sókrates-áætluninni hér á landi. Árið 1999 voru gefin út þrjú
fréttabréf, tvö til dreifingar innanlands og eitt á ensku til dreifingar til samstarfsaðila
erlendis.
Alþjóðaskrifstofan tók þátt í sameiginlegri kynningu Norðurlandanna á háskólanámi
á Norðurlöndum á ráðstefnu NAFSA-samtakanna í Bandaríkjunum.
Starfsmenn Alþjóðaskrifstofunnar kynntu starfsemi hennar á námskynningu Háskólans
11. apríl og vikulegir kynningarfundir voru haldnir fyrir stúdenta sem
hugðust fara utan í stúdentaskiptum. Margar óskir berast um kynningu á námi
erlendis frá framhaldsskólum á höfuðborgarsvæðinu og einnig utan af landi, og
er reynt að verða við öllum þeim beiðnum. Einnig er töluvert um það að einstakar
námsbrautir innan H.Í. leiti eftir sérstakri kynningu á framhaldsnámi erlendis og
á möguleikum til stúdentaskipta fyrir stúdenta viðkomandi námsbrautar.
Landsskrifstofa Sókrates-áætlunar Evrópusambandsins
Eitt af verkefnum Alþjóðaskrifstofunnar er rekstur Landsskrifstofu Sókratesáætlunar
Evrópusambandsins. Undir Sókrates-áætlunina heyra nokkrar undiráætlanir:
Erasmus-áætlunin sem lýtur að skólum á háskólastigi og þegar hefur
verið greint frá, Comeniusar-áætlunin sem lýtur að skólum á leik-, grunn- og
framhaldsskólastigi, Lingua-áætlunin sem lýtur að eflingu tungumálaþekkingar
og áætlanir sem lúta að opnu námi, fjarnámi og fullorðinsfræðslu.
Sókrates-menntaáætlun Evrópusambandsins 1995–1999 lauk upphaflegu fimm
ára tímabili sínu í árslok 1999. Fjöldi þátttakenda hefur vaxið ár frá ári og um áramótin
1999–2000 hafði rúmum 2,2 milljón evrum verið úthlutað til hátt á annars
þúsunds íslenskra nemenda, kennara og skólastofnana til þátttöku í áætluninni.
Íslendingar tóku fyrst þátt í Erasmus-stúdentaskiptum 1992. Frá þeim tíma til
1999 hafa 642 íslenskir háskólastúdentar farið utan á vegum áætlunarinnar og
439 erlendir stúdentar komið hingað til lands. Sókrates II tekur gildi árið 2000 og
stendur til ársloka 2006.
Alþjóðaskrifstofan hefur í umboði menntamálaráðuneytisins umsjón með tungumálanámskeiðum
sem kennurum býðst að sækja í Graz í Austurríki og „European
Label“ viðurkenningu Evrópusambandsins sem er veitt fyrir nýjungar í tungumálakennslu.
Upplýsingastofa um nám erlendis
Innan Alþjóðaskrifstofunnar er starfrækt Upplýsingastofa um nám erlendis, sem
er opin öllum almenningi. Markmið hennar er að safna, skipuleggja og miðla
upplýsingum um nám erlendis. Vaxandi þáttur í starfseminni er að fylgjast með
nýjungum og breytingum á Netinu og tengja gagnlegar slóðir við heimasíðu Alþjóðaskrifstofu
og Upplýsingastofu. Um 6000 manns notuðu þjónustu Upplýsingastofunnar
á árinu. Flestir þeirra eru háskólastúdentar og þeir sem huga á stúdentaskipti.
Samskipta- og
þróunarmál
Helstu verkefni samskipta- og þróunarsviðs eru:
• Umsjón með útgáfu á kynningarritum Háskóla Íslands. Má þar nefna útgáfu
Fréttabréfs og almenns kynningarefnis um Háskólann, útgáfu Árbókar í
samstarfi við rektorsskrifstofu, ritstjórn heimasíðu Háskólans og fræðslu fyrir
starfsfólk þar að lútandi,
• umsjón með símaþjónustu skiptiborðs,
26