Árbók Háskóla Íslands 1999 - Háskóli Íslands

Landsbókasafn Íslands –
Háskólabókasafn
Rekstur
Heildarrekstrarfé safnsins, að meðtöldum sértekjum, nam 392,9 m.kr. á árinu
1999. Þar af var fjárveiting til ritakaupa 70 m.kr. (Ritakaupasjóður H.Í. 46,5 m.kr.,
Landsbókasafnsþáttur 23,5 m.kr.) og fjárveiting frá H.Í. vegna lengingar opnunartíma
13,3 m.kr. Mannafli nam um 100 stöðugildum að meðtöldum ráðningum
vegna tímabundinna verkefna.
Árangursstjórnun
Þrítugasta desember 1999 var undirritaður árangursstjórnunarsamningur milli
safnsins og menntamálaráðuneytisins, og gildir hann fyrir tímabilið 1. janúar
2000 til 31. desember 2002. Tilgangur samningsins er að festa í sessi ákveðið
samskiptaferli milli ráðuneytis og stofnunar, auk þess að draga fram áherslur
vegna stefnumótunar og áætlanagerðar. Samningurinn felur ekki í sér fjárhagslegar
skuldbindingar af hálfu ríkisins, rekstrarframlag safnsins er eftir sem áður
ákveðið í fjárlögum fyrir hvert þessara þriggja ára um sig.
Aðföng rita
Alls bárust safninu um 14 þúsund bækur og bæklingar á árinu 1999. Þar af voru
keyptar bækur um 3.960 bindi. Tímarit, blöð og ritraðir voru samtals um 5.000,
þar af 1.855 keyptar áskriftir. Allmikið af ritum sem gefin hafa verið safninu bíða
skráningar og eru ekki inni í þessum tölum.
Skráning í tölvukerfi
Færslur í Gegni, Greini (tímaritsgreinar) og Gelmi (handrit) voru orðnar um 837
þúsund í lok ársins og fjölgaði um rúmlega 117 þúsund á árinu. Bókasöfnum sem
eiga fulla aðild að Gegni fjölgaði úr níu í tíu, en auk skrár safnsins hýsir hann
einnig samskrá um bækur 20 annarra bókasafna og tímarit um 60 bókasafna.
Útlán
Útlán voru um 72 þúsund og voru svipuð og á fyrra ári. Þar af var um 41 þúsund
lán til stúdenta við H.Í. og um níu þúsund til starfsmanna H.Í. Útlán í útibúum og
lán á lestrarsali þjóðdeildar og handritadeildar eru ekki inni í ofangreindri tölu,
auk þess sem mikið af ritum er á sjálfbeina og því ekki skráð í lán séu þau notuð
innan safnsins.
Lenging opnunartíma
Eins og getið er í skýrslu síðasta árs tókst Háskólanum að útvega fjármagn á
fjárlögum til að lengja opnunartíma safnsins enn frekar en orðið var. Gerði Háskólinn
samning við safnið um framkvæmd lengingarinnar, og tók hann gildi 1.
febrúar 1999. Samkvæmt samningnum verður safnið opið sem hér segir níu og
hálfan mánuð á ári: mánudaga til fimmtudaga kl. 8:15–22:00, föstudaga kl.
8:15–19:00, laugardaga kl. 9:00–17:00 og sunnudaga kl. 11:00–17:00. 1. júní – 15.
ágúst er opið virka daga kl. 9:00–17:00 og laugardaga kl. 10:00–14:00.
Skylduskil
Samkvæmt lögum nr. 43/1977 um skylduskil til safna veitir Landsbókasafn viðtöku
öllu því sem prentað er í landinu eða gefið út sem hljóðrit. Skilaskyldan tekur
til fjögurra eintaka af prentuðu máli en þriggja af hljóðritum. Eitt þessara eintaka
er sent áfram til Amtsbókasafnsins á Akureyri, hinum heldur Landsbókasafn.
1. ágúst 1997 skipaði menntamálaráðherra nefnd til að endurskoða gildandi
lagaákvæði um skylduskil, undir forystu landsbókavarðar. Nefndin skilaði drögum
að frumvarpi í desember 1999. Meðal þess sem lagt er til að bætist við sem
skylduskilaefni eru hvers kyns rafræn gögn. Frumvarpið verður til meðferðar Alþingis
á árinu 2000.
Nokkrar gjafir
• Á samkomu starfsmanna safnsins 4. janúar færði Finnbogi Guðmundsson
fyrrverandi landsbókavörður safninu tuttugu binda ljósprentun Munksgaards
af íslenskum fornritum. Gjöfin er færð safninu í minningu nær hálfrar aldar
ferils þeirra feðganna í embætti landsbókavarðar, Guðmundar Finnbogasonar
1924–43 og Finnboga 1964–94.
• Hertha Töpper-Mixa óperusöngkona afhenti safninu 23. júní hluta af tónverkasafni
eiginmanns síns, tónskáldsins dr. Franz Mixa, en hann lést 1994.
141