22. Estudios y rechiras arredol d´a lengua aragonesa y a suya ...

Un trango más enta ra normatibizazión
de l'aragonés. Trasliterazión e adautazión
de a onomástica no aragonesa
Santiago Bal Palazios
Con se lio d'a Fabla Aragonesa
Reflesions chenerals sobre a normatibizazión
Tot prozeso normalizador e normatibizador que gose enrestir un idioma ye
defízil e complexo. En o que pertoca á o luengache cutiano, a normatibizazión
gosa estar problemática e debanta enzenditas pasions, sólo salbables por l'alfabetizazión
e sozializazión en e de a propia luenga normatiba. E isto ye asinas
porque normatibizar os rechistros coloquials (dialeutals e mesmo idioleutals)
de cualsiquier luenga, como l'aragonesa, que antimás ye estata, e ye encara,
amplamén sozmesa á un albandono e disprezio seculars, pasa por tener nesezariamén
que chirar arredol d'una bastida estreita e seguntes unos regles de
chuego poco flesibles. En efeuto, cal siempre nabatiar entre o respeto por a
fabla de os charradors patrimonials (muitas begatas plena de barbarismos e
bulgarismos), o equilibrio entre os diferens dialeutos, a considerazión de a
luenga decumentata dende antigo e a lochica eboluzión natural de o idioma.
Por ixo bi ha begatas que, presa una soluzión normatiba dezaga de luengas e
luengas oras de serio treballo, dimpués de capuzar-se en decumentazión, informes,
exemplos e parando cuenta en a propia lochica ebolutiba e formadera de
l'aragonés, belunos se sienten feritos u mesmo ocheto de traiduría. Pero isto no
ha á fer-nos reblar, pos a perbibenzia d'una luenga minorizata como l'aragonés
pasa nesezariamén por una normatibizazión de o rechistro formal, una normatibizazión
razional e d'amplas miras, sin mirar-se o mélico, pero sin mirar-lo-se
á denguno. Qui no quiera entender que os rechistros coloquials (dialeutals e
idioleutals) han á refirmar-sen en un rechistro formal e normatibo -que, como
ye de dar, abrá á estar único e uniboco- no fa dengún fabor á ra luenga aragonesa,
simplamén ye apostando por o esmicazamiento idiomatico e firmando a
sentenzia de muerte de o propio rechistro coloquial, porque os rechistros coloquials
sólo tienen buena salú cuan han un rechistro formal de referenzia en o
que acubilar-sen.
En os zaguers trenta años hemos puesto beyer cómo, china-chana, s'ha
enantato en iste prozeso normalizador e normatibizador, anque encara mos en
queda muito camín que fer. E iste camín cal fer-lo e cal correr una mica más
que dica agora, no baiga á estar que por ir masiau amoniquet plegué un inte
en que no aigamos enta do ir.
167