Agtutubo a Babbai 1

Naisangayan a Pangiwanwan para iti
Panangiraman Kadagiti Kameng nga
Addaan iti An-annayen
Idi rinugian ni Jesus ti naespirituan a panagserbina ditoy a biag, simrek iti sinagoga iti
ilina a Nazaret iti Aldaw a Panaginana ket nagtakder a nagbasa.
“Ket intedda kenkuana ti libro ni propeta Isaias. Ket idi binistradna ti libro,
natumponganna ti disso a nakaisuratan daytoy. Ti Espiritu ti Apo adda kaniak, ta
tinudingannak a mangted kadagiti naimbag a damag kadagiti napanglaw; imbaonnak a
mangipakaammo ti pannakaluk-at kadagiti nakayawan, ken ti pannakakita dagiti bulsek,
tapno luk-atak dagiti maparparigat” (Lucas 4:17–18).
Iti unos ti naespirituan a panagserbina, impangruna ti Mangisalakan dagiti makasapul iti
naisangayan a tulong. Nupay gagangay a saan a naikkan iti teknikal a pannakasanay
wenno pasilidad ti mannursuro iti siled a pagadalan ti Simbaan a mangted propesional a
pannarabay kadagiti kameng nga addaan iti an-annayen, manamnama a tunggal
mannursuro iti Simbaan addaan iti mannakaawat ken mannaripato a puso ken tarigagay
a mangiraman kadagitoy a kameng a makasapul agingga a mabalin kadagiti amin a
panagadal iti klase. Dagiti kita ti kameng a makasapul iti naisangayan a panangasikaso
iramanna dagiti addaan iti an-annayen iti panunot, panagdengngeg, panagkita, bagi,
panagsao, kultura (ken pagsasao), rikna, iti gimong, tawen, ken panagadal. Makatulong
dagiti sumaganad a pangiwanwan iti tunggal mannursuro iti yaasideg kadagitoy a
kameng a makasapul iti naisangayan a kasapulan.
Ammuen dagiti kasapulan ken kabaelan ti tunggal kameng ti klase. Kasarita dagiti
dadaulo ti kinasaserdote, nagannak, ken kamkameng ti kaamaan, ken no mayannatup,
kadagiti mismo a kameng nga addaan iti an-annayen, tapno maammuan dagiti
naisangayan a kasapulanda.
Sakbay nga awagan dagiti kameng ti klase nga agbasa, agsarita, wenno agkararag, isakbay
a kasarita ida babaen ti panangsaludsod, “Kayatmo kadi ti agbasa iti klase, agkararag iti
sango, ken dadduma pay?”
Padasenyo nga ipangruna ti pannakairaman ken panagadal dagiti kameng nga addaan iti
an-annayen.
Penkenyo a maaramid ti amin a kabaelan tapno maipanamnama nga ikkan ti tunggal
kameng ti klase iti rumbeng a panagdayaw ken pannakaawat ti tunggal maysa a kameng
ti klase.
Agbalinkayo a gagangay, mannakigayyem, ken nadekket. Anak ti Dios ti tunggal maysa
kadatayo a makasapul iti ayat ken pannakaawat, ania man ti pagkurangan wenno
kadagsenna.
Nasken a laglagipen dagiti mannursuro iti Simbaan a tunggal kameng, ania man ti
kabaelan ti bagi, panunot, rikna, wenno iti kabaelan iti gimong, addaan iti nakaskasdaaw
a kabaelan a dumur-as iti alimpatok ti kinadios. Addaantayo iti rebbengen a mangipakat
iti naisangayan a kabaelan, no kasapulan, a mangisuro kadakuada iti amin a kabaelanda
nga adalen. Laglagipen dagiti balikas ti Mangisalakan, “Gapu ta inaramidyo iti maysa
kadagitoy kanunumuan kadagitoy kakabsatko, inaramidyo met kaniak” (Mateo 25:40).
ix