Agtutubo a Babbai 1

Nasantuan a
kasuratan ken
pammaneknek
Nasantuan a
kasuratan
108
“Ngem malagipko daytoy ken ti lalat a baina nga agtiltillayon iti barikesna. Kasangsangok
ti maysa kadagiti nangbalud kaniak ket kasla nagsardeng ti panagtaray ti darak.
“‘Naagapadmo ti Ravensbruck iti bitlam,’ kinunana, ‘Guardiaak idi idiay.’ Dinak la ketdi
malagip.
“‘Ngem manipud iti dayta a kanito,’ intuloyna, ‘nagbalinakon a Kristiano. Ammok a
pinakawannak ti Dios iti kinakuspag nga inar-aramidko idiay, ngem kayatko a mangngeg
a mismo kenka. Fraulein,’ naitanggaya manen ti dakulap—‘mapakawannak kadi?’
“Ket nagtakderak idiay—siak a madagdagullit a mapakawan dagiti basolna—ket saanak
mamakawan. Natay ni Betsie iti dayta a lugar—mapunasna kadi ti in-inut a nakaamamak
nga ipapatayna babaen laeng ti idadawatna?
“Nalabit a saan unay a nabayag a nagtakder idiay—a nakatanggaya ti dakulapna—ngem
kaniak kasla adu nga oras ti pannakipinnettengko iti karikutan a banag nga ita pay laeng
nga aramidek.
“Ta nasken nga aramidek daytoy—ammok dayta. Adda kangrunaan a pagrukodan ti
mensahe a mamakawan ti Dios: a pakawanentayo dagiti nangdangran kadatayo. ‘No
diyo pakawanen ti naglabsingan dagiti tao,’ kuna ni Jesus, ‘uray ti Ama iti langit dina met
pakawanen dagiti naglabsinganyo.’
“Ammok a saan laeng a bilin ti Dios, ngem inaldaw ketdi a padas. Manipud idi naggibus
ti gubat addan taengko iti Holland para kadagiti biktima ti kinaranggas dagiti Nazi.
Dagidi nakapakawan kadagidi sigud a kabusorda nakapagsublida met iti lubong ket
nabaliwanda manen a buklen ti biagda, uray ania man ti nabati a piglat iti bagi.
Nagtalinaed a di makakunkunail dagidi nangtaraken iti sakit ti nakemda. Kasta ti
kinagagangay ken kinasaemna.
“Ket nakatakderak latta nga adda lamiis a manglenglengnges iti pusok. Ngem saan a
rikna ti pammakawan—ammok met dayta. Aramid ti kaunggan ti pammakawan, ket
agtignay ti kaunggan ania man ti rikna ti puso. ‘ . . . Tulongannak!’ inkararagko a
siuulimek. ‘Maitanggayak ti dakulapko. Nalaka la nga aramidek dayta. Sika ti mangted iti
rikna.’
“Ket kas iti kayo nga awanan rikna, basta lattan ginaw-atko ti nakatanggaya a dakulap.
Ket iti kasta nga inaramidko, nagari ti nakaskasdaaw a banag. Adda nagkarayam a
bibineg manipud iti abagak, nagpababa iti takiagko, a nagliteng kadagiti nagsabat a
dakulapmi. Sa kasla linapunos daytoy makapia a bara ti sangabukel a kinataok, a
namaglua kaniak.
“‘Pakawanenka, kabsat!’ Nagsangitak. ‘iti amin a pusok!’
“Nabayag a nagraip dagiti dakulapmi, ti sigud a guardia ken ti sigud a balud. Diak pay
nakarikna “no idi laeng iti kasta kinabileg nga ayat ti Dios,” (naadaw manipud iti “I’m Still
Learning to Forgive” ni Corrie ten Boom. Nabaliwan a naipablaak babaen ti pammalubos
ti Guideposts a magasin. Copyright © 1972 by Guideposts Associates, Inc., Carmel, New
York 10512).
Panangigibus
Igibus ti adalen babaen ti panangibasa iti Doktrina ken Katulagan 64:8–10 kadagiti
babbalasitang ken panangiladawan iti pannursurona babaen ti bukod a pagarigan wenno
ti pudno a padas ti maysa a tao. Iburayyo ti pammaneknekyo maipanggep iti kinapateg ti
panangtungpal iti daytoy a pagbatayan no kayattayo a gun-oden dagiti bendision nga
inkari kadatayo ti Apo.
Baliwan a basaen ti Taga-Efeso 4:32 manipud iti paskil ket paregtaen dagiti agtutubo a
babbai nga agbalin a naanus ken manangngaasi kadagiti dadduma babaen ti
panagsursuro a mamakawan ken mangsurot iti pagarigan ti Mangisalakan.