Agtutubo a Babbai 1

Adalen 19
“‘Ala, ania ngarud met daytoy? Kuaderno a di nasuratan amin? Asino ti nalinteg ti
panagpampanunotna a nangidulin iti daytoy? . . . ’
“Immasideg ni Jennie ket kinitana ti libro nga ig-iggaman ni John. . . .
“‘Ania kadi ti ibagbagana?’ dinamag ni Alice, nga immasideg iti inana ken ti kabsatna a
lalaki.
“‘Agurayka,’ insungbat ni John a nagtugaw ket rinugianna a basaen, a linibtalibtawanna ti
sumagmamano a panid.
“Mayo 4, 1888. . . .
“‘Oy, kasla nakaisuratan ti mapaspasamak iti inaldaw wenno listaan ti padpadas wenno
ania ketdi daytoy!’
“Mayo 4, 1888: Inkahon manen ni Nanang ti biolinko iti daytoy nga agsapa. Kunana a
dakkel a tubeng kaniak daytoy iti pananggatasko kadagiti baka. Panagkunak, adda
kalinteganna. Pagpiaanna ketdi ta nagaggaget dagiti dadduma a lallaki ngem siak wenno
dikami ketdi koman agbiag a walo iti daytoy sangkabassit a talonmi. Nasaysayaat koma ti
biagmi no sibibiag pay ni Tatang.
“Septiembre 3, 1888: Imbaga ni Mister Carter ken ni Nanang ita nga aldaw a naisuronan
kaniak amin nga ammona ket kasapulak ti mannursuro nga ad-adu ti ammona. Adda
maysa a Sister Kendall idiay Coalville a maikameng koma nga agtokar iti orkestra ti
Philadelphia sakbay a nagkameng iti Simbaan ken immakar iti laud. Inkari ni nanang a
mabalinko ti agsaludsod kenkuana no mabalinnak nga alaen a suruanna. Parikut laeng no
mano ti singirenna iti panangisurona. Mapalubosanak a mangaywan kadagiti manok ket
idulinko dagiti paglakuan kadagiti itlog a pagbayadko iti musikak. . . .
“Abril 8, 1892: Naamirisko ita nga adda tallo a banag nga ad-adda a patgek ngem amin
dagitoy: ti Apo, ti kaamaak, ken ti musikak. Ket ammok itan a ti panagayat iti maysa a
banag saan a tubeng iti panagayat iti sabali. No nasayaatda amin a banag,
makapagkaykaysada.
“Disiembre 1, 1892: Naladaw unayen, ngem diak makaturog. Ti la nagkopia iti musika ti
inaramidko iti agpatnag babaen ti tulong ni Nanang. Naibaga kaniak a mapanak idiay
Salt Lake tapno agawdision iti maysa a parte iti orkestra a para iti teritorio. . . .
“Marso 5, 1893: Kalpasan ti sumagmamano a lawas a panagsanay a nabalballaetan iti
panawenko nga agkararag, napanak nagawdision idiay Salt Lake. Imbaga kaniak ni Mr.
Dean, ti konduktor, a siak pay laeng ti nangngegna a kalaingan a biolinista iti laud ti
Denver. Manmano siguro ti nangngegna a naggapu iti laud a Denver ngem naragsakan
ni Nanang idi ipadamagko kenkuana. Mapanak agsanay idiay Denver iti serrek ti
panawen a panagreregreg ti bulong, ket umdas ti matgedak a pangtarakenko iti bagik ket
adda pay maibingayko ken ni Nanang ken dagiti dadduma. Tokarek iti miting ti
sakramento iti Domingo ti maysa a musika ni Mozart a naadalko iti panagpadas.
“Marso 11, 1893: Apay nga ita pay ti pannakapasamak daytoy? Apay nga iti daytoy a
paset ti panagbiagko? Kalpasan ti miting ti sakramento iti Domingo, inawagannak ni
Obispo Reynolds iti opisinana ket sinaludsodna no kasanon ti pannakapadasko. Imbagak
kenkuana a naalakon, ket dinamagna kaniak no diak mayalud-oden ti panagtokarko iti
orkestra iti dua a tawen. Inlawlawagna kaniak a sakbay a manggedak, adda pay banag
nga utangko iti Dios ti amin. Nga awan duadua iti panunotna nga isu ti pagayatan ti Dios,
dinawatna kaniak nga awatek ti awag ti mision. Ammok nga utangko amin nga adda
kaniak iti Dios ket saan unay a dakkel a dawaten ngem kas man la kaipapanna ti
pannangtedko ti amin a kabaelak. Ngem ammok a ti di pannakatinong ti kaunggak adadda
ngem ti panagduaduak isu nga inkarik iti obispo a no adda pamuspusan a
pannakapaaddak iti kuarta a kasapulan, awatek ti awag. . . .
“Marso 13, 1893: Iti karabianna imbagak ken ni Nanang ti maipanggep iti awag ti mision.
Nalaus ti ragsakna. Arapaap unay ni Tatang ti agmision, kinunana, ngem napapatay
sakbay a natungpal ti arapaapna. Ita matungpalen ti panagmisionna babaen kaniak. Idi
dinamagko kenkuana no pangalaanmi iti kuarta, limmidem ti rupana. Iti
panangilawlawagko kenkuana a diak umannugoten nga aglakokami pay iti daga,
imbagak kenkuana ti inkarik iti obispo. Nalanay ti ikikitana kaniak sana kinunana, ‘Ben,
adda pamuspusan a pangalaantayo iti kuarta. Adda banag a kukuatayo nga umdasen ti
pategna a pagmisionmo. Nasken nga ilakom ‘ta biolinmo.’
87