Agtutubo a Babbai 1

158
Maikari a Musika, Maikari a Pampanunot
Panagsasarita iti filmstrip ni Elder Boyd K. Packer
“Idi ubingak pay, nagnaedkami iti balay a napalawlawan iti muyong. Kasla saan nga
umdas ti danum a para kadagiti kayo. Dagiti kanal, a kanayon a kakkali iti panawen ti
panagtutubo, agkaruotanton iti saan a mabayag. Iti maysa nga aldaw, iti panangimatonko
iti pananuman, nakitak ti bagik a maipasungalngal iti parikut. Iti panagayus ti danum
kadagiti intar a naglabbetan iti ruot, aglayus la ketdi iti amin a turong. Nagkaliak iti pitak
iti panangikagumaanak nga agtambak. Apaman nga adda masullatak a giwang adda
manen sabali. Adda immasideg a kaarruba iti kamuyongan. Nagbuya biit, sa idi kuan
babaen ti sumagmamano a napigsa a panangipakanna iti pala nawayaanna ti lansad ti
kanal ket sinurot ti danum ti inaramidna a pagturongan. Kinunana, ‘No kayatmo nga
agtultuloy ti danum iti turongna, nasken a mangaramidka iti pagturonganna.’
“Naammuak a ti pampanunot, kas iti danum, agtultuloy iti papananna no wayaantayo iti
pagturonganna. No saan, suroten ti pampanunottayo ti turong a nalaklaka, a kanayon a
sapulenna ti nababbaba nga agpang. Nalabit a ti kangrunaan a karit ken ti karikutan a
pakaipasungalngalanyo iti daytoy a biag isu ti panangadalyo a mangtengngel iti pampanunotyo.
Kinuna ti Biblia, a kas tao ‘no ania ti pampanunotenna iti kaungganna, kasta ti kinataona’
(Dagiti Proverbio 23:7). Asino man a makatengngel iti pampanunotna naparmeknan ti bagina.
“Iti panangsursuroyo a mangtengngel iti pampanunotyo, maparmekyo ti bisioyo, uray pay
dagiti makaibaba a bukod a bisio. Mabalinyo a gun-oden ti bileg ti pakinakem, parmeken ti
buteng, ken maaddaan iti naragsak a panagbiag. Namin-adun a naibaga kaniak bayat ti
panagdakkelko a nasken a matengngel ti panunot, ngem awan ti nangibaga no kasano.
Adu a tawen a pinampanunotko daytoy a kasla entablado ti panunot. Bayat ti pabuya
marenren ti kurtina. Kanayon nga adda maar-aramid a pabuya iti dayta nga entablado.
Mabalin a komedia, nakakalkaldaang, makaay-ayo wenno makauma, nasayaat wenno
dakes; ngem kanayon nga adda maipabpabuya iti entablado ti panunottayo.
“Nadlawyo kadi a mabalin a sumeksek dagiti aragaag a babassit a pampanunot ket
awisenda ti imatangyo iti ngalay ti dandani amin a mapaspasamak iti dayta nga
entablado ken awan ti pudno a rantayo? Dagitoy sutil a pampanunot rimbawanda ti
tunggal maysa. No baybay-anyo ida nga agtuloy, pumanaw iti entablado amin a naimbag
a pampanunot. Mapanawankayo, gapu ta immannugotkayo iti daytoy, iti pangaring
dagiti killo a pampanunot. No sumukokayo kadakuada, ibagiandakayo iti entablado ti
panunotyo iti ania man iti pagpatinggaan ti kabaelanyo. Mabalin nga ibagianda dagiti
tema ti kinapait, ilem, wenno sakit ti nakem. Mabalin a bulgar, saan a nadalus, wenno
ultimo a kinadakes. No addada iti entablado, no palubosanyo ida, agaramatda iti
kasikapan a panggutigot a pangawisda iti imatangyo. Mabalinda nga aramiden a makaayayo,
ken maawisdakayo pay a mamati a nalintegda, ta pampanunot la dagitoy. Ania ti
aramidenyo iti kasta a kanito, no iturturong dagiti sutil a narugit a panagpampanunot,
nalitemda man a kurang la a nadalus, wenno dagiti narugit nga awan a pulos ti
pagduaduaan? No mapunnoyo ti pampanunotyo iti nadalus ken makapasayaat a
pampanunot, awan no kua ti lugar dagitoy mammilit a pilio, ket pumanawda.
“Maamirisko nga iti daytoy agdama a lubong masansan a narikut a punnuen ti panunotyo
iti maikari a pampanunot. Kasapulan daytoy ti naannad a panangtengngel. Nupay kasta,
mabalin a maaramid no mangilatangkayo iti natalged a lugar a pagtalinaedan ti
pampanunotyo. Nakasarakak iti wagas a pakaaramidak iti kasta a lugar, ket kayatko nga
ibinglay kadakayo. Adda pakainaigan ti musika—maikari a musika. Naminsan a kinuna ti
masirib a lalaki, ‘Maysa ti musika kadagiti kabilegan nga instrumento a pangituray iti
panunot.’ Iturayanna man iti mainugot a wagas wenno dagiti saan a mainugot
makedngan babaen ti no ania ti idatengna iti entablado ti panunotyo. No masaoyo a
makaparegta iti espiritu ti kanta wenno dagdagennakayo a mangkita iti bagiyo iti
nadaydayaw a panirigan, pakairanudan ti musika. No makalinglingay laeng wenno itagayna
ti espirituyo, adda met lugar a pakaipasanganna. Ngem no riingenna ti
kinailubonganyo, iti naderrep a wagas, wenno mangpanunot kadagiti di nasayaat a
tarigagay, nasken no kua a maliklikan dayta a musika. Saan a maikari.
“Kanayon nga adda dagiti mangala iti napipintas a banag sada dadaelen ida. Napasamak
iti nakaparsuaan; mapasamak iti literatura, drama, arte; ket nalabit a napasamak met iti
musika. Iti uneg ti siniglo a tawen nakabatbatad a no maaramat ti biddut a kita ti balikas