udhezues gjuha 5

Metoda
6. - Testet e parashikimit
Vështrim i përgjithshëm mbi metodën
Testet e parashikimit mund të përdoren për të aktivizuar ose testuar njohuritë që nxënësi
ka marrë për një etapë të caktuar në mënyrë që të evidentohen njohuritë që nxënësi
ka fituar sipas objektivave të parashikuar. Këto teste promovojnë leximin aktiv dhe
mendimin kritik.
Procedura e metodës:
1. Identifiko konceptet kryesore që nxënësi duhet të fitojë nëpërmjet leximit.
2. Zgjidh alternativa se si këto koncepte mund të mbështesin ose sfidojnë atë që
besojnë nxënësit.
3. Formulo 4-6 kërkesa mbi një temë për të cilën nxënësit mund të kenë njohuri ose
informacion të mëparshëm. Nxirr pikat e rëndësishme, konceptet kryesore, idetë
kundërshtuese dhe keqkuptimet. Mos përfshi formulime të thjeshta, të cilat mund t’u
përgjigjen thjesht me po ose jo.
4. Shpërndajua testet nxënësve. Lëri ata të reagojnë ndaj çdo formulimi, duke formuar
përgjigjen e tyre dhe duke u përgatitur të mbrojnë opinionin e tyre.
5. Diskutoji këto formulime në klase. Pyet se sa ranë dakord ose jo me çdo formulim.
Nxënësit që kanë pikëpamje të ndryshme duhet të argumentojnë zgjedhjet ose përgjigjet
e tyre.
6. Lejoji nxënësit të lexojnë tekstin e zgjedhur në mënyrë që të gjejnë prova mbështetëse
ose kundërshtuese për përgjigjet e tyre. Nxënësit mund të konfirmojnë përgjigjet e tyre
fillestare, të rimendojnë përgjigjet e tyre në qoftë se është e nevojshme dhe të shtojnë
ndonjë informacion.
7. Diskuto me klasën se çfarë mësuan nga leximi.
7. - Grafikët organizues
Vështrim i përgjithshëm mbi metodën
Grafikët organizues paraqesin informacion pamor të qartë dhe të kuptueshëm.
Qëllimi nuk është thjesht paraqitja e përmbajtjes së informacionit, por krijimi i një lidhjeje
midis ideve. Ato i ndihmojnë nxënësit të tregojnë dhe rikujtojnë informacionin që kanë
në dorë si dhe në kuptimin e asaj që lexojnë.
6
Procedura e metodës:
1. Shpjegoju nxënësve qëllimin dhe dobinë e përdorimit të grafikëve organizues.
Tregoju nxënësve se, duke përdorur një grafik organizues, ata mund të shtojnë aftësitë
e tyre shprehëse dhe të të mbajturit mend.
2. Shpjegoju konkretisht një grafik organizues.
3. Shpjegohu dhe modelo se si të përdorin një grafik organizues me informacionin të
njohur, pastaj me informacionin e ri.