187_knyha-1-166

ЭДЕБИЯТ НАЗАРИЕСИ
ЯЗЫЛЫ ЭДЕБИЯТНЫНЪ ШИИРИЙ ШЕКИЛЛЕРИ.
ГЪАЗЕЛЬ. МЕСНЕВИ
Гъазель — шаркъ шиириетинде кениш ишлетильген
шекиллеринден биридир. Гъазель 5—12 бейиттен ибарет ола.
Оларнынъ мевзусы кеништир. Базы гъазеллер ашкъ, севгили,
шарап, гузеллик, къадынлыкъ мевзуларында язылыр. Фельсефе,
тасаввуф, дин ве огретиджи, насиат бериджи (дидактик) мевзуларда
язылгъан гъазеллер де бар.
Гъазаийнинъ бир гъазелини мисаль этип алайыкъ да, оны
анълатайыкъ:
Киче юзьнинъ хасретидин пес ки гирьян олды шем,
Атеш-и гъам шулесиддин янды сузан олды шем.
Корьди ким олмаз мюневвер арызынъдын мунджели,
Къальб-и ашыкъ гиби ахир янды хирман олды шем.
Безм-и васлынъ хасретидин башлады яш тёкмеге,
Субхадек дюнья эвинде герчи михман олды шем.
Субх-и васле корьди ахир етмеги олмыш мухаль,
Эксилюб гъам бирле омри хаке ексан олды шем.
Эй, Гъазаий, гех висалы фикр къылды, гех фиракъ,
Гяхи гирье къылды гъамдын, гяхи хандан олды шем.
Гъазельнинъ биринджи бейити озьара — гирьян, сузан, олды
шем сёзлери иле къафиелеше. Къалгъан бейитлернинъ биринджи
мисралары (мунджели, яш тёкмеге, олмыш мухал, гех фиракъ)
сёзлери озьара сербест къафие тизелер. Къалгъан бейитлернинъ
экинджи мисралары исе биринджи бейиттеки (гирьян, сузан,
хирман, михман, ексан хандан) сёзлери озьара къафиелешелер.
Экинджи сатырларнынъ сонъунда текрарлангъан (олды шем,олды
шем, олды шем, олды шем) киби сёзлерге редиф дерлер. Бу
гъазельде «олды шем» сёзлери редиф сайылыр. Схемада о «R»
арфи иле косьтерилир.
Гъазельнинъ ильк бейитине матла дерлер. Матла гъазельнинъ
пейда олув ерини ве башланувыны анълатыр.
Гъазельнинъ сонъки бейитине макъта дерлер. Макъта
гъазельнинъ биткенини анълатыр. Макъта бейитинде сыкъ-сыкъ
шаирнинъ ады анъылыр.
109