lorca

Por último, Augusto María Casas insistía na importancia que tiñan estes
poemas para a literatura galega, nesta hora dun novo renacemento literario.
A súa lectura pousaba, no seu corazón de escritor galego, unha doce alegría
triunfal, de inefable sabor. Federico saboreara a poesía dos nosos trobadores
e románticos e rendía un tributo cordial á Galicia de Rosalía de Castro:
«... La publicación de este libro –gracias a “Nós”– justifica todo
el júbilo esperanzado de los poetas gallegos contemporáneos.
Quien no comprenda la importancia de este suceso literario es
que no quiere ver ni oír...» (El Pueblo Gallego,8-5-1936) 170.
3.3.2. Federico, poeta alófono e trobador do Sur
«A terra é a poesía. Nós somos, apenas, os poetas»
Blanco-Amor 171 .
Eduardo, a pesar de ser unha testemuña principal na explicación dos
Seis poemas galegos, insiste en que as cousas da poesía ocorren sempre por
medios máxicos. Nunca saberemos a explicación real dun texto poético e,
polo tanto, tampouco destas poesías. Podemos, iso si, achegarnos a unha
explicación do fenómeno poético, pero tendo sempre en conta o misterio
radical de toda poesía.
Na súa conferencia do Centro Galego de Buenos Aires de 1959 dicía
que esta poesía de Federico non era un divertimento ou exercicio literario
de préstamo. Dun chouto, o poeta andaluz colocárase na cerna da nosa
poesía. E con «perturbadora naturalidade», sen sinais de esforzo, nin rodeiras
de exercicio retórico. Eduardo, para explicalo, recorría a metáforas que
empregou en máis dunha ocasión para falar da universalidade da nosa poesía:
manto imperial e raíces infiltrantes da nosa lírica nas outras linguas peninsulares.
García Lorca, despois de Poeta en Nueva York, está interesado pola
poesía tradicional. E así penetra nesta tradición poética española por dúas
vías: a poesía arábigo-andaluza (Diván del Tamarit) e a poesía dos
Cancioneiros (Seis poemas galegos). Blanco-Amor afirmaba por aquelas datas
que o noso clasicismo chamábase medievalismo e por esta cancela en-
170
Agradézolle a Antón Capelán Rey o terme facilitado copia documental dos derradeiros
testemuños destes comentarios periodísticos.
171
«Recital Antolóxico da Lírica Galega», 24-07-1956, Centro Galego de Buenos Aires.
Gravación facilitada por Alfonso V.-Monxardín.
155