beskrywing van gesondheidsorgdiens wat aan miv-blootgestelde

„n Noemenswaardige uitdaging ten opsigte van die voorsiening van ART aan kinders
is die beperkte integrasie van die ART-program met ander PGS-dienste. Tans word
ART deur middel van die implementering van vertikale programme soos die IMCI-
strategie, PMTCT-, EPI- en TB-program, wat gewoonlik onafhanklik van mekaar
funksioneer, voorsien. Die funksionele skeiding van hierdie dienste dra daartoe by dat
kinders nie deurlopende sorg vir „n komplekse siektetoestand soos MIV, ontvang nie
(Committee on Pediatric Aids - Section on International Child Health, 2007:842;
Meyers et al., 2007:478).
2.5.4 Beskerming van kinderregte
Kinderregte verwys na spesifieke posisies en beskerming, waarop kinders te midde
van die konteks waarin hulle hul bevind, aanspraak kan maak. Alle kinder-regte word
deur die Grondwet van Suid-Afrika, asook die United Nations Conven-tion on the
Rights of the Child, waarvan Suid-Afrika op 16 Junie 1995 „n ondertekenaar geword
het, onderskryf (Van Dyk, 2008:457; SA. The Constitution of the Republic of South
Africa, 1996).
Aangesien die MIV-pandemie „n impak op die gesondheidsprofiel van kinders het,
hou kinderregte ook verband met die behandeling wat „n MIV-blootgestelde/-
positiewe kind of sy/haar versorger kan verwag indien die kind dit benodig. Shung-
King en Zampoli (2004:45) argumenteer dat daar (ten spyte van die sterk regtebasis
waarbinne Suid-Afrika funksioneer) nog nie aan alle kinderregte, veral die regte van
kinders met MIV, voldoen word nie. Die ideaal vir kinders met MIV is dat hulle tot
dieselfde mate as volwassenes toegang tot alle dienste met betrekking tot MIV sal hê.
Volgens die New Strategic Plan is beskikbare fasiliteite hoofsaaklik vir volwassenes
ontwerp en toegerus. Daarom geniet kinders in lae sosio-ekonomiese gebiede nie
voldoende toegang tot MIV-behandeling nie. In hierdie verband behoort die belange
van alle kinders, met inagneming van tussentredes soos voorkoming, behandeling en
ondersteuning, by alle gesondheidsorgfasiliteite prioriteit te geniet (SA. DvG,
2007b:37, 60). Shung-King en Zampoli (2004:6) voeg by dat kinders omvattende sorg
benodig en nie slegs die toediening van ART nie.
81