beskrywing van gesondheidsorgdiens wat aan miv-blootgestelde

Gedurende die transformasieproses het twee strategieë as hoekstene van die
nuwe gesondheidsorgbedeling verrys. Aan die een kant was daar „n duidelike
klemverskuiwing na die lewering van primêre gesondheidsorg (PGS), en aan die
ander kant was daar die bekendstelling van die distriksgesondheidsorgsisteem.
(Denhill, 2009:16; Van Rensburg & Pelser in Van Rensburg et al., 2004:132).
Suid-Afrika is vandag in nege provinsies verdeel, elk met sy eie provinsiale
gesondheidsorgdepartement wat verantwoordelik is vir die implementering van
nasionale gesondheidsorgbeleid. Die land se distriksgesondheidsorgsisteem
bestaan uit 56 gesondheidsorgdistrikte waarvan vyf in die Vrystaat is. Die
veronderstelling van die distriksgesondheidsorgsisteem is dat dit as voertuig sal
dien waardeur omvattende en geïntegreerde PGS, tot op die vlak van distriks-
hospitale, aan gemeenskappe gelewer sal word (Atkins & Chopra in Zwiegenthal
et al., 2009:59, 60).
Die lewering van gesondheidsorg is egter nie net tot PGS beperk nie. Diegene wat
te siek is om by PGS-fasiliteite behandeling te ontvang, sal normaalweg na hoër
vlakke van gesondheidsorg verwys word (Atkins & Chopra in Zwiegenthal et al.,
2009:65; Campbell, Duke, Weber, English, Carai, Tamburlini & Pediatric Hospital
Improvement Group, 2008:984). Die herorganisering van gesondheidsorgdienste
het meegebring dat gesondheidsorg aan die Suid-Afrikaanse publiek tans hoof-
saaklik op drie vlakke plaasvind. In die volgende afdeling van die hoofstuk word „n
beskrywing van die sorgvlakke, sowel as die soort diens wat op elke vlak gelewer
word, bespreek.
2.2.1 Die vlakke van gesondheidsorg in die Suid-Afrikaanse
publieke sektor
Die drie vlakke van gesondheidsorg strek vanaf die primêre- tot die tersiêre vlak.
„n Vierde vlak, naamlik die kwartenêre vlak, is „n term wat soms gebruik word om
hoogs gespesialiseerde en duur dienste soos orgaanoorplantings te beskryf, maar
val buite die bestek van hierdie studie en sal dus nie bespreek word nie
(Westwood & Power in Kibel et al., 2007:209, 214, 215).
25