beskrywing van gesondheidsorgdiens wat aan miv-blootgestelde

Inligting was gekategoriseer deur vrae in vier afdelings te rangskik. Die eerste
afdeling het vrae oor die soort gesondheidsorgfasiliteit, asook die distrik waarin die
fasiliteit geleë was, bevat. In die tweede afdeling (wat ook geslote- en oop-einde vrae
bevat het) het die navorser inligting met betrekking tot die deelnemer (PV) se
kwalifikasies bekom. Die derde afdeling het vrae oor die beskikbaardheid van
dokumentasie en behandelingsriglyne vir pediatriese MIV bevat. Geslote- en oop-
einde vrae, wat die mate waartoe behandelingsriglyne daagliks deur PV‟s gebruik
word, asook inligting met betrekking tot die opleiding wat PV‟s in hierdie verband
ontvang het, is ingesluit. Die laaste vraag (oop-einde) in hierdie afdeling het aan PV‟s
die geleentheid gegee om hulle opleidingsbehoeftes met betrekking tot pediatriese
MIV weer te gee. Die vierde afdeling het geslote- en oop-einde vrae oor aspekte met
betrekking tot dienslewering aan MIV-blootgestelde/-positiewe kinders bevat. Die
orde van hierdie afdeling se vrae was op so „n wyse gerangskik dat dit die algemene
verloop van behandeling aan hierdie kinders gevolg het. Omdat die behandeling van
hierdie groep pasiënte gewoonlik kompleks is, het die vraelys detail ten opsigte van
behandelingsriglyne en die toepassing daarvan bevat.
3.5 POPULASIE
„n Populasie sluit alle individue/objekte wat sekere kenmerkende eienskappe besit in
en kan ook die teikenpopulasie genoem word (Polit & Beck, 2004:727; Uys & Basson,
1991:86). Die teikenpopulasie is daardie groep individue/objekte waarin die navorser
geïnteresseerd is en van waaruit afleidings gemaak sal word (Babbie & Mouton,
2001:100). Vir die doeleindes van hierdie studie is alle publieke gesondheid-
sorgfasiliteite, binne die vyf bestaande distrikte van die Vrystaat, as die
teikenpopulasie geïdentifiseer. Die soort gesondheidsorgfasiliteit, en die totale aantal
fasiliteite soos wat dit per distrik voorkom, word in Tabel 3.2 aangedui.
95