beskrywing van gesondheidsorgdiens wat aan miv-blootgestelde

Twee belangrike beginsels ten opsigte van „n doeltreffende verwysingsisteem is,
eerstens, dat dit „n tweerigting kommunikasieproses sal insluit. Kliënte behoort
gemaklik van laer-vlak dienste na hoër vlakke verwys te kan word en andersom.
Die tweede beginsel is dat kliënte wat na hoër vlak fasiliteite verwys is, so gou as
wat hul gesondheid dit toelaat, na laer vlakke van sorg terugverwys sal word. Hulle
behoort dus so min as moontlik tyd in die instansie waarheen hulle verwys is, deur
te bring (Van Rensburg & Pelser in Van Rensburg et al., 2004:150). Die gevolg
van „n effektiewe verwysingsisteem is dat gesondheidsorgverbruikers met minder
ernstige toestande, in laer-vlak sentra, terwyl diegene met meer komplekse siekte-
toestande, in hoër-vlak sentra, versorg sal word (Siddiqi, Kielmann, Khan, Ali,
Ghaffar, Sheikh & Mumtaz, 2001:197). Die ideaal is dus dat „n effektiewe PGS-
verwysingsisteem daartoe sal bydra dat individue, wat van die gesondheid-
sorgsisteem gebruik maak, so maklik en koste-effektief as moontlik tussen die
vlakke van sorg sal beweeg.
Die fokus van hierdie studie is die lewering van gesondheidsorg aan MIV-
blootgestelde/-positiewe kinders op al drie vlakke van die publieke gesondheid-
sorgsisteem in die Vrystaat. Voordat die spesifieke sorg wat hierdie kinders moet
ontvang bespreek word, word die soort diens wat op elke sorgvlak in die Suid-
Afrikaanse gesondheidsorgsektor vir kinders aangebied word, vervolgens
bespreek.
2.3 KINDERGESONDHEID IN KONTEKS VAN DIE SUID-
AFRIKAANSE GESONDHEIDSORGSISTEEM
Tot en met volwassenheid word „n kind se lewe deur verskeie biologiese,
psigologiese en sosiale ontwikkelingsfases gekenmerk. Die mate waartoe „n kind
suksesvol deur hierdie fases beweeg, is grootliks van die intervensie van hulle
versorgers afhanklik. In hierdie verband kan kindergesondheid beskou word as „n
dissipline in die gesondheidsorgsektor waar gesondheidsorgwerkers gemoeid is
met: (a) die bevordering van optimale gesondheid van kinders, (b) die voorkoming
van siekte en gestremdheid en (c) die effektiewe behandeling van siek kinders
(Kibel et al., 2007:1, 2).
35