beskrywing van gesondheidsorgdiens wat aan miv-blootgestelde

5.2.6 Deelnemervooroordeel
Die netjiese voorkoms van 'n onderhoudvoerder laat deelnemers gewoonlik
gemakliker tydens onderhoude voel (Burns & Grove, 2009:404; Babbie & Mouton,
2001:251;). Daarom het die navorser die veldwerkers aangeraai om hul uniforms
tydens veldwerk te dra. Hierdie professionele drag het 'n neutrale posisie van die
onderhoudvoerder ten doel gehad. Die deelnemer se belewenis van die
onderhoudvoerder se beeld kon egter dié van intimidasie, asook vrees om die
"verkeerde" antwoorde te gee, gewees het. Dit kon 'n invloed gehad het op die
eerlikheid waarmee PV's vrae beantwoord het.
5.3 WAARDE VAN DIE STUDIE
Die navorser kon wel deur middel van die tegnieke wat in die studie aangewend is,
die doel van die studie bereik en 'n beskrywing gee van dienslewering aan MIV-
blootgestelde/-positiewe kinders wat van publieke gesondheidsorgfasiliteite in die
Vrystaat gebruik maak. Een van die prioriteite van die DvG is om MIV-geaffekteerde
kinders en hul versorgers te ondersteun, en hulle het reeds verskeie stappe geneem
om dienslewering aan hierdie persone te verbeter. Die resultate wat deur hierdie
studie bekom is, kan moontlik tot hierdie proses bydra.
Die bekendmaking van studieresultate kan voorts daartoe bydra dat die Vrystaatse
DvG dienslewering aan MIV-geaffekteerde kinders uitbrei deur die samestelling van
effektiewe opleidingsprogramme wat PV's, wat gesondheidsorg aan kinders lewer,
teiken. Hierdie intervensie kan tot voordeel van die kinders strek.
Navorsingsbevindinge en aanbevelings kan verder daartoe lei dat opvolgstudies die
kwessie van gefragmenteerde dienslewering en ontoereikende opleiding aan PV's,
wat 'n diens aan kinders lewer, as prioriteite vir diensverbetering insluit. Die waarde
wat die studie vir PV's inhou, is dat die studieresultate moontlik as 'n motivering vir
bykomende opleiding kan dien. Opleiding hou nie net voordele vir die PV's in nie,
maar ook vir die Vrystaatse publieke gesondheidsorgsektor, die gemeenskap, en
veral die kinders wat deur vaardige personeel versorg sal word.
199