beskrywing van gesondheidsorgdiens wat aan miv-blootgestelde

Die breë benadering wat in die verklaring van Alma-Ata ten opsigte van die lewe-
ring van gesondheidsorg vervat is, het verskeie debatte ontketen oor die mate
waartoe PGS as „selektiewe‟ of „omvattende‟ diens beskou moet word. Om aan te
dui hoe die implementering van PGS deur die onderskeie benaderings geraak
word, word enkele aspekte van die twee uitgangspunte vervolgens kortliks
bespreek.
2.2.1.1.3 Die implementering van primêre gesondheidsorg
Julia Walsh en Kenneth Warren het ongeveer „n jaar na die Alma-Ata-konferensie
voorgestel dat „selektiewe primêre gesondheidsorg‟ voorlopig as vertrekpunt vir
PGS geïmplementeer moes word. Die skrywers het aangevoer dat die gesondheid
van baie mense intussen deur die bestryding van „n paar van die belangriker en
meer algemene siektetoestande, soos malaria en tuberkulose (TB), bevorder kon
word (Walsh & Warren, 1979:967). Hierdie siening het egter geen ruimte vir
gemeenskapsbetrokkenheid en die daaropvolgende sosiale en ekonomiese groei
en ontwikkeling, soos deur die verklaring van Alma-Ata voorgestel is, gelaat nie
(Baum, 2007:36; Magnussen et al., 2004:169). Die gevolg van selektiewe PGS,
was die ontwikkeling van verskeie siekte-georiënteerde, vertikale programme, wat
verband gehou het met onder andere sanitasie, skoon water, gesinsbeplanning en
immunisering (Montegut, 2007:514).
Ten einde die unieke gesondheidsorgbehoeftes van Suid-Afrika aan te spreek, is
twee benaderings binne die PGS-konteks geïdentifiseer, naamlik: 'n selektiewe
benadering en 'n omvattende benadering. Waar 'n selektiewe PGS-benadering
spesifieke gesondheidsorgprobleme of siektetoestande deur middel van die
implementtering van vertikale gesondheidsorgprogramme aanspreek, sluit 'n
omvattende PGS-benadering ook die sosiale konteks en lewensomstandighede in
waarin mense hulle bevind (Heunis et al., 2003:10). In teenstelling met die
implementering van vertikale PGS-programme, wat slegs enkele spesifieke siekte-
toestande aanspreek, behoort omvattende PGS dus deur „n gesondheid-
sorgsisteem, wat meer as net basiese sorg aan individue verskaf, gelewer te word.
De Haan in Heunis et al. (2003:10) beskryf dit as volg:
29