pedalangan jilid 2

367
212. Sumalidewa : Mbesuk dadak ngenteni apa ngger, elinga negara
wus ancik-ancik ana tepining bebaya.
Yen bisa enggala antuk jago kang bisa mbrastha
pepetenging negara.
213. Sumalintana : Nuwun inggih ngestokaken dhawuh rama
214. Mangkupraja : Nuwun menapa ingkang abdi dipun keparengaken
ndherekaken Raden Sumalintana.
215. Sumalidewa : Patih, sira aja melu. Cukup ajaken perang undur-undur
Prabu Jalawalikrama. Tegese, yen
Prabu Jalawalikrama maju ing palagan, undurna
para wadyabala, supaya bisoa ngolor wektu
kanggo ngenteni jago kang den upadi dening
bendaramu Sumalintana.
216. Mangkupraja : Menawi mekaten ngestokaken dhawuh sinuwun.
217. Sumalidewa : Wis ya ngger, mangkata dina iki dak sangoni
puja lan puji umiring lakumu muga enggal ketemu
jago kang bisa ngilangi klilip Negara Purwacarita.
218. Sumalintana : Ngestokaken dhawuh, nyuwun pamit kanjeng
rama.
219. Sumalidewa : Sing ngati-ati ngger, belanana mbakayumu
Sumaliwati aja nganti kawengku dening nalendra
kang angkara.
Gangsa mungel Ayak Kempul Kerep laras Sendro pathet Wolu, ringgit
bedholan. Sumalintanan kabedhol atur sembah lumampah mangiwa,
Sumalidewa kaentas manengen, Mangkupraja kabedhol atur
sembah kaentas mangiwa. Sigeg kayon tanda wonten njawi keraton.
Gendhing suwuk lajeng pocapan kairing gadhingan. Jroning pocapan
sareng nglampahaken Sumalintana saking tengen mangiwa marambah-rambah.
Pocapan
Candrane wong lumampah adoh rupa candra. Rupa barang kang
katon, candra barang kang wis dadi. Roning medi, ron gegodhongan,
ning neng ing jroning raos, sasi pinolah nagita rawa ? bumi buda, bumi
lemah buda suwung, tanah kang durung tinanduran bumi buda
arane hawane ketingal swasana pandulu, loro-lorone tingal, mripat
loro ndulu papan adoh nadyan katon loro yen den mataken amung
ketingal sajuga. Mantheng pandulune Raden Sumalintana. Manthenge
saka pandulu saonjotan nilar Negari Purwacarita kancik ana jroning
minangsraya.