pedalangan jilid 2

377
Ginem.
320. Semar : Ngga gus, dipun asta. Ha niki kanggo srana
ndara ngentasi damel.
321. Berjanggapati : Mundura Semar.
322. Semar : Nggih, ati-ati gus. Bagooong ngamping bendaramu
le.
323. Bagong : O ya ma. Raden, mangga dipun ginakaken
kangge ngilangi klilipe dedalan. Oo
Pocapan kairing gadhingan, sinambi mbedhol Semar kaentas manengen,
Bagong kaentas manengen. Berjanggapati ngasta panah tancep
siti inggil tengeh .
Pocapan
Tinampi ponang jemparing dening Raden Berjanggapati. Sanadyan
wujude amung pring apus ning ing rehdene ingkang yasa Sang
Hyang Puguh, Semar Bujagati, lelandhepe dadi pitung penyukur.
Dhasar Berjanggapati limpad dhateng olah kridhane warastra lungit
dhateng pamenthange gendewa. Tinanting kaembat ponang gendewa
lumepas ponang warastra yasane Semar. Kaya thathit saking
bantere warastra. Natap dhadhane, bala denawa pating blesah pating
slayah kaya glonggong kaicak gajah.
Gangsa mungel Alap-alapan laras Slendro pathet Wolu. Berjanggapati
kabedhol gending sirep, mbeksa nedya manah. Saksampunipun
manah nuli kaentas mangiwa. Nglampahaken panah kebat kalih
rambahan. Raseksa samya gegiro lan kiprah, lena , panah kawedalaken
saking tengen nembus dadane buta saknalika pejah kaentas
mangiwa geglundhungan. Berjanggapati medal saking tengen tancep
siti inggil tengen, Semar lan Bagong medal saking tengen tancep
paseban kiwa marep manengen.
Ginem.
324. Berjanggapati : Badranaya.
325. Semar : Kula ndara.
326. Berjanggapati : Gedhe panarimaku dene kakang semar sabyantu
marang aku.
327. Semar : Sak saget-saget kula gus, abot anggen kula
nampi jejibahan kangge kayuwananing momongan
kula. Eee....mumpung dereng surup srengenge,
mangga mbacutaken lampah madosi
keng raka.