pedalangan jilid 2

389
Ginem.
441. Berjanggapati : Hayo Jalawalikrama iki sing mbok jaluk, iki
sing mbok karepna. Sambata ibu pertiwi, aku
kang bakal mocok cagake talinganmu.
442. Jalawalikrama : Adduuh… ya Berjanggapati, yen pancen sliramu
bisa nggawe patiku mara enggal sengkakna.
Kepara aku tumekeng pralaya tinimbang
ora bisa sandhing karo calon garwaku
Dewi Sumaliwati.
443. Berjanggapati : Yen ta kaya mangkono gedhekna tekadmu
arep sowan marang pangayunan tak gelisna
anggonku nguntapna nyawamu. O….
Pocapan kairing gadhingan
Pocapan
Raden Berjanggapati sigra ngayat pusaka. Duwung kaliga saking ponang
warangka. Dhasar putra Durjanapura, ponang pusakane katon
meloh pamor pating galebyar pating kalepyur cahyane. Sedyane arsa
nugel ponang jangga, janggane Prabu Jalawalikrama. Ora krasa
Berjanggapati anggone ngicak ponang walikat. Dangune dangu walikat
mawa riwe gumrobyos saking ragane Jalawalikrama, luuunyu sanalika
ponang walikat. Jalawalikrama kraos yen radi ginggang pangicaking
Berjanggapati. Berjanggapati den jongkrokaken kajengkang,
Jalawalikrama mlesat ing dirgantara.
Gangsa mungel Alap-alapan laras Slendro pathet Sanga. Nedya katigas
janggane Jalawalikrama, sak nalika Jalawalikrama gumregah
uwal saking astane Berjanggapati, mlesat ing dirgantara. Berjanggapati
kaget katungka Kuswanalendra saking tengen tancep siti inggil
tengen, Berjanggapati marep mangiwa atur sembah tancep paseban
kiwa, Semar lan Bagong medak saking kiwa tancep paseban kiwa.
Gendhing suwuk lajeng bendhengan.
Bendhengan
. . . . . . . . . . . . .
3 3 3 3 3 3 3 3 32 2 2 2
Yana andhik dukane sang ra ja pa ti
6 6 6 6 6 3 53 3
Taranggana mangsa sa ran
. . . . . . . . . .