pedalangan jilid 2

402
la jamane Nagara Rogastina garwanipun Subalinata. Pramila saka
adrenging tyas den sengkakaken nggennya lumaksana, sakedhap
netra sampun ngancik Setra Gandamayit.
Pocapan
Kang kinarya sambeting carita nenggih Pasetran Gandamayit, sajuganing
papan minangka setranipun para jin setan peri prayangan
engklek-engklek balung atandak ililu banaspati, jrangkong warudoyong,
gembil lan janggitan. Ora mokal lamunta papan ingkang gawat
kaliwat angker kepati-pati bebasan sato mara sato mati jalma mara
jalma keplayu. Ingkang kinarya tetungguling para peri prayangan,
nenggih Bathari Durga ya Bathari Premoni, pramila ageng pangaribawanipun,
wenang rusak datan wenang rinusak, wenang gawe datan
wenang ginawe, mapan maksih garwane sang Hyang Jagad Giripati.
Lenggah wonten ing bale wewangunan sinebo para bajobarat,
detya kala Jaramaya, Jarameya, Padumeya, Jurumeya hanjrah
ngantos dumugi imba-imbaning pasewakan. Dereng watawis dangu
kasaru sowane kalakirna ingkang sampun pikantuk aji cenda, mangkana
Bathari Durga sigra ngrukmeng driya mangudasmaraning driya.
Gangsa mungel Ayak Kempul Kerep laras Slendro pathet Sanga.
Kayon kalampahaken mangiwa dalah manengen kawalik lajeng tancep
paseban tengen, tanda menawi papan kahyangan. Kalakirna kalampahaken
saking kiwa manengen sarambahan. Gendhing suwuk
sesarengan lampahe Kalakirna, lajeng pocapan.
Ginem.
549. Durag : Yektine ulun wus angerteni dene jeneng kita
kalakirna wus antuk kanugrahan wujud aji
cenda, ingkang saka iku muga jeneng kita
bisa hanjaga sarta ngrumpaka marang aji
cenda kang awujud buta bajang.
550. Kalakirna : Kawula nuwun inggih pukulun, kula tansah
ngestokaken dawuh paduka pukulun.
551. Durga : Banjur samengko apa kang kita sedya sakteruse.
552. Kalakirna : Ingkang kula sedya, nedya sowan ngersanipun
pukulun Bathara Guru, mila kepareng
kula nyuwun idi pangestu paduka pukulun.
553. Durga : Kalakirna iya, tak pangestoni muga kasembadan
apa kang kita sedya.