pedalangan jilid 2

382
Ginem.
362. Kuswanalendra : O....lha dalah. Durung adoh nggonku maku,
iki sapa iki. Satriya sabarak karo aku. Yen
ndeleng panganggo sing mbok agem kaya
dudu patrape wong sudra sliramu.
363. Sumalintana : Nuwun sewu raden, yen raden tambuh karo
aku, aku putra saka Negara Purwacarita atmajane
kanjeng rama Prabu Sumalidewa,
aku Raden Sumalintana.
364. Kuswanalendra : Oo… putra Purwacarita, Sumalintana kekasihmu.
365. Sumalintana : Iya raden, muga kersoa nepungna dhiri sapa
raden taruna, sarta saka ngendi pinangkamu.
366. Kuswanalendra : Aku Putra Durjanapura, putrane kanjeng rama
Prabu Berjanggalawa, Raden Kuswanalendra
aranku.
367. Sumalintana : Sing mburi sapa.
368. Kuswanalendra : Adhiku, Raden Berjanggapati.
369. Sumalintana : Berjanggapati, tepungna aku Raden Sumalintana.
370. Berjanggapati : Inggih raden, kula pun Berjanggapati. Dene
ngantos keraya-raya pinanggih kula kaliyan
kakang Kuswa wonten madyaning wana punika,
badhe mengku karsa punapa……
371. Sumalintana : Iya raden sakarone, malah tiwas kebeneran
mbok menawa iki bakal bisa gawe pepadhange
Negara Purwacarita. Ngene Kuswa, yektine
Nengaraku ing dina iki katempuh ing satru
jaya parangmuka Nalendra Gung saka
Negara Sunggela Manik, Prabu Jalawalikrama.
Negaraku arep niyat di enggo sungsang
bawana balik. Para wadya bala akeh sing
padha kapracondhang siji ae ora ana kang
bisa ngasorake.
372. Kuswanalendra : Alon dhisik, negaramu dijarah rayah dening
Prabu Jalawalikrama iku nalare yo’apa….
373. Sumalintana : Jalawalikrama ngersakake sedulurku tuwa
kakangmbok Sumaliwati. Nanging kangmbok
durung gelem winengku dening priya. Niyate
rinoyok rosa rinebut wani ndadekna pancakara
ing antarane wadya Purwacarita klawan
Sunggela Manik. Ning wadyabala Purwacarita
kabeh padha kasoring jurit kalindih ing perang.