Shendeti Mendor dhe te Drejtat e Njeriut - Arct

SHËNDETI MENDOR DHE TË DREJTAT E NJERIUT 159
Neni 8 i ligjit parashikon se, “Punonjësit e policisë përgjigjen
penalisht, administrativisht, civilisht dhe sipas rregullores së disiplinës
për veprimet dhe mosveprimet e kryera me iniciativë ose në kundërshtim
me urdhrin, si dhe për zbatimin e urdhrave të dhënë jo në formën e
kërkuar nga ligji a rregullorja, ose nga një person a organ jokompetent.
Punonjësi i policisë mban përgjegjësi për zbatimin e urdhrave haptazi
të kundërligjshme. Kur urdhri i dhënë formalisht në përputhje me
rregullat është i kundërligjshëm, punonjësi i policisë mban përgjegjësi
në rast se para kryerjes së veprimit kishte mundësi të vinte në dijeni
organet eprore ose menjëherë mbas zbatimit nuk i ka njoftuar ato për
veprimin e kryer.
Neni 12 parashikon se, “Kur një punonjësi të policisë i kërkohet të
përmbushë një urdhër a një detyrë që është në kundërshtim të hapur
me ligjin, ai është i detyruar ta refuzojë zbatimin e tij dhe të informojë
eprorin më të lartë”.
Neni 10, “Punonjësit e policisë nuk përdorin asnjëherë forcën në
kundërshtim me dispozitat ligjore. Ata marrin dhe japin udhëzime të qarta
e të përpikta për mënyrën dhe rrethanat kur përdoren forca dhe armët”.
Në përputhje me sa më sipër, nenet 6 dhe 7 të ligjit nr. 8321, datë
02.04.1998, “Për Policinë e Burgjeve”, parashikojnë se: “Punonjësit e
Policisë së Burgjeve janë të detyruar të zbatojnë urdhrat e dhënë nga
eprorët sipas shkallës funksionale dhe në raporte të barabarta sipas
hierarkisë së gradës. Urdhrat duhet të jepen në përputhje me detyrën
funksionale e në realizim të saj, si dhe të mos jenë në kundërshtim me ligjin
dhe me dinjitetin e personit të cilit i drejtohen. Në mungesë të eprorit të
drejtpërdrejtë, në raste urgjente dhe kur nuk ka mundësi të komunikohet
me eprorë më të lartë, funksionari me gradë më të lartë ka të drejtën e
urdhrit ndaj funksionarëve të barabartë ose më të ulët në gradë.
Urdhri me shkrim që konsiderohet i paligjshëm duhet të
zbatohet kurdoherë, me përjashtim të rastit kur është haptazi i
kundërligjshëm. Për urdhrat verbalë, që konsiderohen të paligjshëm,
është e detyrueshme dhënia me shkrim kur kërkohet nga zbatuesi
dhe, kur kjo është e pamundur, jepet pas zbatimit të tij. Në të gjitha
rastet, marrësi i urdhrit duhet të njoftojë sa më parë organet eprore për
konstatimin e paligjshmërisë. Për urdhrin e dhënë mban përgjegjësi
në çdo rast urdhërdhënësi, si dhe zbatuesi i urdhrit, kur nuk ka
paraqitur kundërshtimet si më sipër. Për zbatimin e urdhërit haptazi të
kundërligjshëm, mban përgjegjësi në çdo rast edhe zbatuesi.