Предавања 2011 - Универзитет „Св. Кирил и Методиј“

Милан Ѓурчинов
ПОЕТОТ КОНЕСКИ
(ИЗЛАГАЊЕ НА АКАД. МИЛАН ЃУРЧИНОВ
НА ПРОМОЦИЈАТА НА ПРВИТЕ ДВА ТОМА –„ПОЕЗИЈА“,
КН. I И II – ОД КРИТИЧКОТО ИЗДАНИЕ
НА ЦЕЛОКУПНИТЕ ДЕЛА НА БЛАЖЕ КОНЕСКИ)
Почитувани присутни,
Чувствувам потреба да го изразам своето задоволство што во
МАНУ конечно успеавме да ги објавиме првите две книги од Критичкото
издание на целокупните дела на истакнатиот македонски научник
и поет, академикот Блаже Конески.
Со оглед на фактот дека во македонската книжевна наука ова е
прво критичко издание на делата од еден автор, не можам на самиот
почеток да не го поставам прашањето: Што е критичко издание и што
значи тоа Ваквото издание, како што е тоа добро познато во науката,
подразбира верификација, т.е. најверна и најцелосна верзија на автентичниот,
оригиналниот текст. Тој не може повеќе да се менува и затоа
ваквото издание ја подразбира емендацијата – постапка што се засновува
врз исправката на сите грешки и пропусти во претходните изданија.
Блаже Конески за животот имаше неколку изданија на своите
собрани дела, над чија реализација самиот бдееше. Такви изданија, за
жал помалку успешни, се појавија и по неговата смрт во 1993. Но, ова,
сегашново издание, од нив битно се разликува. Најнапред, по тоа што
не станува збор за некое популарно и комерцијално издание со цел
побргу да се распродаде за да се надоместат средствата вложени во
него, а потоа и затоа што ова издание, иако без непосредно учество на
неговиот автор, ги уважува целосно сите направени забелешки од него
самиот. Негова задача и смисла е да биде заокружено научно издание,
кое би требало да биде темелник за сите идни истражувања и
публикации на делото од нашиот голем современик.
Сегашново издание има цел да ги опфати целокупните дела на
Конески, т.е. сите дела од неговиот богат и разностран творечки опус.