Предавања 2011 - Универзитет „Св. Кирил и Методиј“

_________________________________________________________
200
Сакам Вашето внимание да го задржам уште малку, а сигурен
сум дека ова што ќе го изнесам и Вас лично ќе ве интересира, а можеби
и ќе ве поттикне во идните Ваши научни планови и животни работни
преокупации. Нешто ќе проговорам и за индиректното, а не класичното
новинарско информирање. А, еве за што станува збор.
Мислам дека доволно простор посветив на информирањето на
македонските претставници од средствата за јавно информирање за
афирмација на македонистиката. Сега Вашето внимание го свртувам на
информирањето за македонските вредности, а во прв план, на македонскиот
јазик, македонската култура, историја, традиција, археологија,
македонската природа и убавини, од страна на самите учесници на
Меѓународниот семинар за македонски јазик, литература и култура во
Охрид, а тоа сте Вие, почитувани слушатели и учесници што доаѓате од
разни страни на светот. Не сите, но еден значаен дел од Вас, по научувањето
да го пишувате и да го говорите македонскиот јазик и запознавајќи
се се поопширно со македонската литература, почнувате да
пишувате свои статии, реферати, а подоцна и научни трудови на македонски
јазик и со содржина од македонското поднебје, односно од
просторот во којшто живее македонскиот народ во неговата држава
Република Македонија. Дали тоа било за учеството и дружењето на
Семинарот, за убавините на Охрид и неговото езеро, за македонските
традиции и слично, сеедно, но, во Вашите земји по враќањето ги
пренесувате и искуствата од познавањето на македонскиот јазик, со кој,
во исто време, ги запознавате Вашите сограѓани во Вашите земји со
еден јазик и една литература и традиција што сте успеале да ја запознаете
и да ја научите. Таквите статии ги среќаваме во весници, списанија,
или зборници што се објавуваат на Вашите универзитети во Русија,
Полска, САД, Канада, Австралија, Романија, Германија, во
Словенија или Кина и слично. Се разбира, ние овдешните домаќини,
Македонци, со тоа се гордееме и многу ни е мило што на тој начин ги
афирмирате на многу простори од светот – вредностите на севкупната
македонистика.
За да ги потврдам овие констатации ќе наведам и примери.
Долго време, благодарејќи на присуството и активното учество на
Меѓународниот семинар за македонски јазик, литература и култура во
Охрид, потоа од изучувањето на македонскиот јазик на македонските
лекторати во странство, многумина слависти – македонисти ја изучуваат
поопстојно македонската историја, посебно историјата и развојот
на македонскиот јазик. Можеби некој од Вас, присутните за првпат ќе
слушне за некое познато славистичко име, но тоа со посебна чест и
гордост со години се изговара и се чита во нашата македонска средина.
И однапред, се извинувам ако не спомнам некое име што многу значи
за македонската наука за јазикот, но, со посебен респект ќе спомнам
неколкумина што и јас лично ги познавам и со кои заеднички сме ги