Предавања 2011 - Универзитет „Св. Кирил и Методиј“

Снежана Веновска-Антевска
ВЛОГОТ НА БЛАЖЕ РИСТОВСКИ
ВО РАСВЕТЛУВАЊЕТО НА ЖИВОТОТ
И ДЕЈНОСТА НА КРСТЕ П. МИСИРКОВ
Обидот да ги поврземе и да ги претставиме, во скициран
приказ, делата, дејноста и активностите на Блаже Ристовски и на Крсте
П. Мисирков произлезе од неколку причини. Како што се наметнуваа
прашањата околу она што е основно, носечко, за да се направи една
селекција и да се издвои битот во поврзаноста на елементите со секој
сегмент од поставеноста на првобитниот план само се зголемуваше.
Токму затоа ова претставување и поврзување на Б. Ристовски и К.П.
Мисирков е само нацрт во споредба со она што може да се зборува и да
се пишува за нив, од една страна одделно, а од друга страна и неизбежно
во она што е заедничко. Почетниот импулс беше да се поврзат
две важни годишнини – 80 години од раѓањето на Блаже Ристовски и
85 години од смртта на Крсте П. Мисирков. Ако се повикаме на
размислите дека големината на личноста и на делата што ги сторила таа
може да се согледаат реално само од дистанција и кај двете личности
имаме причина и простор да ја согледаме големината и истрајноста во
творештвото и во упорноста да се остане на посветеноста кон македонските
прашања кои, наедно, не се само теми поткрепени со идеи и идеали,
туку внатрешен порив да се пронајде и да се претстави македонското
себепрепознавање и себепретставување, именувано многу често
во последниве десет години, а наедно и сублимирано во претставата за
македонскиот идентитет.
Кон 80-годишнината на академикот Блаже Ристовски
Предноста прво да дадеме еден краток преглед на животниот
пат и на дел од творештвото на академикот Блаже Ристовски ја избравме
поттикнати од мислата дека станува збор за личност што е
творечки активна и што постојано ни носи нови сознанија за она што
може да се смета за историографија на македонскиот јазик. Тука само
ќе споменеме дека кога се избираат теми од оваа област потребно е