Digitale versie - Afbeeldinge ende Levens beschryvinge van de ...

ende die heer den Burchgraef van Leyden
soude hebben ende besitten die suytsyde tot
Dordrecht toe, genoempt Rynlant. Maer die
keyser van Romen Carolus Caluus dit
horende is hier inne seer vertoernt geweest
ende heeftet graefschap van Hollant ende
Seelant ende die Heerlicheit van Vrieslant
gegeven een Eelman genoempt Dirck van syn
geslachte ende vanden huyse van Aquitanien
ende ter stondt is hy mit groet gewelt
gecomen mitten selfden Eelman ende heeft
Seelant ingenomen ende daer nae is hy
gecomen in Hollant mar Heer Wolbrant, Heer
tot Egmont, verhoerende Keysers coempts is
hem mit alle beyde syn swaghers ende mit
beyde syn soenen te gemoet gecomen ende sy
hebben seer gevochten, maer die heer van
Egmont heeft den slach verloren, want
Keysers heer was te machtich. Want daer inne
waren vier Hartogen, seven Graven ende
Baronen sonder getal. In dese slach syn
geslagen die Heer van Arkel, die Burchgraef
van Leyden, den Heer van valckenburch des
Burchgraven brueder voerszeyd ende Rolant
des heren van Egmonts outste soen, ende
Heer Wolbrant selfs siende dat hem ende de
synen die slach verloren was, is mit syn
jongste soen Rabodus ende ses hondert vrome
cloecke mannen tot Egmont gevlucht; ende
die Graef Dirick mit den keyser heeft hollant
ter stondt onder hem gebrocht, mer tot
Egmont en dorsten sy niet comen, want sy
heer Wolbrants cracht eens besocht hadden.
Mer Hartoch Otto van Saxen horende dat syn
swagher heer Wolbrant seer benaut was, heeft
hy hem gesonden drie duysent lantsknecht,
die Heer Wolbrant seer blydelicken ontfangen
heeft, ende heeft daer by vergaert een deel
Vriesen ende is die grave Dirick (die nu die
keyser vertoghen was) weder te velde
gecomen in’t dorp (dat doe ter tyt Bever
hiete) ende sy hebben daer crachtilicken ende
vromelicken gevochten van smargens te vier
urren tot savonts te negen urren tue; ende dat
geroop der mannen ende der menschen, dat
geluydt ende clanck der trompetten ende dat
neyen der paarden mochtmen over vier mylen
hoeren. Doen heeft hem heer Wolbrant mit
syn soen Rabodus soe vroemlichen geweert
ende gevochten dat hy victorie gecreghen
heeft ende heeft den Graef sonder ophouden
ut den landen verdreven. Die Graaf siende dat
hy die slach verloer, heeft hy geroepen mit
Wolbrant I
luyder stemme: Wyck, Wyck, Wyck! ende
hier om hiet dit dorp Beverwyck, dat te
vorens hiete Bever. Dese groete wonderlichte
victorie is geschiet int jaer ons heeren viiJ c
ende Ixiiij (03-05-864) op’t heylige Cruys
dach in Mey, waeromme dat die inwoenders
van Beverwyck tot noch toe in een teyken
ende memorie van dese groete wonderlicke
victorie op die selfde heylich Cruys dach
groete solemniteyt of ommegang houden. Die
Graef dus verdreven wesende is gevlucht tot
den keyser Carolus Caluus. die welcke als hy
dit gehoert heeft, weder omme in Hollant mit
die graef synen neeff gecomen is ende alle
gelegentheit des saecke wel doertast ende
ondersocht hadde, heeft hy aen die heer van
Egmont vriendelicke brieven geschreven,
beteykende hem dach ende plaetse, te weten
in een dorpe genoempt Bevervoert, om te
spreken van een vriendelick accorde tuszchen
hem ende die graef synen neef. Ende die heer
van Egmont ontvangen hebbende dese
vriendelicke brieven, is totter voerszeyde
plaetse gecomen ende heeft den keyser
Carolus Caluus vriendelicke aldaer
ontvangen. Ende nae veel woorden die
tuszchen haer beyden vielen, heeft die keyser
Carolus Caluus den saeck ganselicken aen
hem selen genomen ende heeft een utsprake
gedaen in deser manieren: Angesien dat ick
Carolus Caluus, keyser van Romen, ut myn
keyserlicke miltheyt heb gegeven ende
gegont Dirick van Aquitanien mynen neef dat
Graefschap van Hollant, Seelant ende
Vrieslandt, ende aengesien dat ick bevinne
dat sommige heeren ende bysonder die Heer
van Egmont, die Burchgraaf van Leyden,
heer van Waszenaer, ende die Heer van Arkel
daer groet recht in hebben, dat welcken onse
voervaderen Puppyn van Harstel, Hartoge van
Brabant ende Coning van Vrancryck ende
Carolus Martellus hier voertyts geapprobeert
hebben, Alsoe begheer ick mede mit dese
edele heeren een ewige pays ende vrede te
maecken in deser manieren: in den eersten sal
die Heer van Egmont behouden ende besitten
Egmont mit die thien naeste dorpen
omleggende, die Heer van Arkel sal behouden
ende besitten dat lant van Arkel, ende die
Burchgraaf van Leyden sal behouden Leyden
mit Rijnlant, ende hier boven sal myn neef,
die grave van Hollant voerszeyd, geven ende
schenken den Heer van Egmont voerszeyt ses
Hfdst. 28 - Bl. 05
211