Digitale versie - Afbeeldinge ende Levens beschryvinge van de ...

want sy begheerde van hem vyftich duysent
vrancsche kronen iaerlix tot haer tafel, dat
hem onmogelick was op te brenghen; dus is
tusschen die moeder ende dat kindt grote
oerloghen op gestaen, ende int iaer xiii c .
ende li (1351) hebben sy malcander een slach
gelevert in Zeelant daer die moeder die
victorie gehadt heeft. Ende graef Willem is
seer bedruct gecomen tot heer Jan van
Egmont om hulp ende bystant te hebben,
ende heer Jan barmharticheit hebbende mit
graef Willem heeft hem bystand geloeft,
waeromme graef Willem weder om syn vroumoeder
int selfde iaer op sinte Martyns dach
in die somer slach gelevert heeft ende dese
slach is geschiet op die Mase te scheep ende
is alsoe bloedigen slach geweest dat dies
gelyck voer noch nae in Hollant noyt gesien
of gehoert is. In dese stryt hadde graef
Willem die victorie meest doer hulp van heer
Jan van Egmont, ende vrou Margriete syn
vroumoeder is gevlucht in Engilant by haer
suster die Coninginne; ende hier inne worden
veel heeren gevanghen ende bysonder die
heer van Brederoede, die teghens graef
Willem geweest hadde; ende nae dese slach
en vloyde die Mase in drie daghen niet dan
bloet. Dese heer Ian van Egmont ende
Iselsteyn heeft gesticht een Cloester binnen
Iselsteyn van sinte Bernardus oerde dat hy
ryckelichen begaeft ende beghift heeft mit
syn eyghen goet. Ende hy is ghestorven int
iaer ons heeren xiii c . ende lxx den xxvii dach
van december (27-12-1370) als hy xxxix (39)
jaer geregiert hadde ende is tot Iselsteyn by
syn huysvrou begraven.
Johan / Jan I
Detmold L3 nr 429 fol. 131.
Dese heer Jan van Egmondt ridder nam tot
een wijff guileam heer ghijsbert van
ijselsteijns dochter daer hij bij wan ses zonen
ende seven dochters Die ijerste hiet Aernt en
was heer van egmondt en ijselsteijn die
andere was Jonckar Jan die sonder keijnder
sterff Die darde was heer gherit ridder die
troude vrou Willem van Watering Die vierde
was heer Willem van Zueter*** ridder Die
vijfde was otto En die sesde heer albert
canonicke sinte marijen tot utrecht Die ijerste
dochter troude heer ghijsbrecht van Vijanen
*1 Die andere troude heer gherit van
culenborch Die derde troude heer philips die
burchgraeff van Leijen ende heer van
Wassenaer Die vierde troude heer
bartholomeus van raephorst ridder Die vijfde
was een claris tot die Hertoghenbosch Die
seste Joffer Marij van rijsing Die sevende
hiete berta en troude Joncker Walrave van
brederode een jongste broeder was tot
brederode ome die en creech ghien keijnder
Dese heer Jan was mede in die streijt op die
maess mit die dolle graeff Hij sterf int Jaer
ons heren M.ccc.lxx (1370) en leijt tot
ijselsteijn begraven
Hfdst. 47 - Bl. 05
346
*1: In de marge
wordt Vianen
vermeld. Dit is niet
leesbaar.
Het is van een
andere auteur.
Hiernaast
A. ten Bruggencate
Bl. 5.
Links
Het portretje uit de
Detmoldkroniek.