Ivan Dobnik - Vilenica

Начин на постоење
Премногу падови и вознесувања
не се архивирани во книгите
што се спалуваат во вообичаените војни.
Запишал ли некој дека трошките
фрлени од прозорецот паѓаат побрзо
од снегулките, дека водопадите се само жртви
на своето име? За падот на царствата и епохите
се пишува, не за старецот што ја гледа играчката
откопана од булдожерите.
Семафорот не може да го спречи времето
и нашата несигурност е само начин
на постоење на тајните.
Стравот постои во далечините, кога саѓите
се одделуваат од искрите одејќи
кон небото, но никој досега не напишал
трактат за чадот од свеќата
во ноќ што се претопува, ниту за капките восок
што ни се стврднуваат врз чевлите:
сите за пламенот зборуваат
што ги осветлува нашите лица.
Видов сонови
Видов сонови на кои никој не се сеќава
и плачења на погрешни гробови.
Видов прегратки во авион што паѓа
и улици со отворени артерии.
Видов вулкани што спијат подолго
од коренот на семејното стебло
и едно дете кое не се плаши од дождот.
Само мене никој не ме виде,
само мене никој не ме виде.
Nikola Madžirov · 189