36164_Árbók 2005 - Háskóli Íslands

Guðfræðideild og
fræðasvið hennar
Starfsfólk
Á árinu fékk guðfræðideild heimild til að ráða séra Sigfinn Þorleifsson sjúkrahúsprest
í 25% starf lektors í sálgæslu og er staðan tengd staða sem fellur undir
samstarfssamning Landspítalans og Háskóla Íslands. Sigfinnur hefur verið
stundakennari í sálgæslu um árabil og mun ráðning hans hafa þær afleiðingar að
nám í þessari mikilvægu grein eflist til muna.
Nýskipan náms í guðfræðideild
Meiri reynsla er nú komin á þá nýskipan guðfræðinámsins sem gerir ráð fyrir því
að allir nemendur ljúki BA-námi (90e) og eigi síðan kost á að láta þar staðar
numið eða halda áfram annaðhvort með hefðbundið nám til embættisprófs eða að
taka MA-nám með áherslu á einhverju ákveðnu fræðasviði innan guðfræðinnar.
Deildin hefur samþykkt nauðsynlegar breytingar á reglugerð guðfræðideildar til
þess að auðvelda þessar breytingar og verða þær væntanlega staðfestar af háskólaráði
fljótlega. Unnið er að frekari skipulagningu guðfræðinámsins með það í
huga að BA-prófið sé fyrsta háskólagráða og þar með þurfi að meta nám til bæði
MA-prófs og embættisprófs sem framhaldsnám. Lærdómstitillinn candidatus theologiae
mundi við það breytast í magister theologiae. Hið þverfaglega nám í almennum
trúarbragðafræðum sem hafið er við deildina sem 30 e aukagrein til
BA-náms hefur gefið góða raun. Það standa vonir til að unnt verði að auka þetta
nám enda er mikið um það spurt meðal nýstúdenta. Ástæða er til að ætla að
þarna liggi einn helsti vaxtarbroddur guðfræðideildar. Að náminu standa guðfræðideild,
heimspekideild og félagsvísindadeild.
Framhaldsnám er hafið við deildina, bæði á meistara- og doktorsstigi. Skráðir
framhaldsnemar eru 13 og er þess skammt að bíða að fyrsti doktorsneminn verji
ritgerð sína að loknu formlegu doktorsnámi við deildina.
Fjölgun nemenda
Aðsókn að guðfræðideild hefur verið tiltölulega jöfn undanfarin ár. Eins og undanfarin
ár heimsóttu guðfræðinemar framhaldsskólana og kynntu deildina. Hins
vegar var litlu sem engu fé varið til að gera kynningarbæklinga.
Alls voru 150 nemendur skráðir í deildina á árinu en ekki dugði sú fjölgun til þess
að skila deildinni auknum fjármunum. Þar spilar inn í að námsframvinda nemenda
er í mörgum tilfellum mjög hæg og skilar meðalguðfræðineminn tiltölulega
fáum þreyttum einingum. Konur eru sem fyrr í miklum meirihluta nemenda eða
tæplega 70%.
Nefndir og stjórnir
Kennarar guðfræðideildar eiga sæti í ýmsum nefndum og stjórnum á vegum
þjóðkirkjunnar. Má þar nefna þýðingarnefndir Gamla- og Nýja testamentisins,
stjórn Leikmannaskóla þjóðkirkjunnar, kenningarnefnd þjóðkirkjunnar og helgisiðanefnd
þjóðkirkjunnar. Þá eru kennarar guðfræðideildir virkir í ýmsum rannsóknaverkefnum
eins og nánar kemur fram í ársskýrslu Guðfræðistofnunar.
Samstarf við Endurmenntun Háskólans
Áfram var haldið samstarfi við Endurmenntun Háskólans á sviði sálgæslu og er
mikil eftirspurn eftir þeim námskeiðum, ekki aðeins meðal presta og guðfræðinga
heldur ekki síður meðal heilbrigðisstétta. Námskeiðin eru á meistarastigi og
ákveðnar forkröfur þarf því að uppfylla til að fá að taka þátt í þeim og hafa þau
mælst mjög vel fyrir.
102
Fjárveitingar og útgjöld guðfræðideildar
2003-2005 (þús. kr.).
2003 2004 2005
Útgjöld (nettó) 47.179 43.381 48.357
Fjárveiting 44.146 44.146 47.183