36164_Árbók 2005 - Háskóli Íslands

skyldi. Galdur mannlegra samskipta er kannski umfram allt sá að við erum sífellt
og jafnvel óafvitandi að gefa eitthvað af sjálfum okkur án þess að vænta nokkurs í
staðinn – vegna þess að sameiginlega sköpum við annað og meira en okkur sjálf.
Ég þakka öllu starfsfólki Háskólans heilshugar fyrir stuðning og hvatningu. Ég
þakka menntamálaráðherrum góð samskipti og vil ég sérstaklega nefna Björn
Bjarnason sem ég starfaði lengst með í rektorstíð minni.
Rektor Háskóla Íslands nýtur daglega stuðnings, velvilja, hjálpsemi og fórnfýsi
fjölda fólks bæði innan skólans og utan sem hugsar og vinnur í anda þeirrar hugsjónar
sem gerir Háskóla Íslands að því öfluga fræðasetri sem hann er. Þetta vil
ég sérstaklega segja við Kristínu Ingólfsdóttur nú þegar hún tekur við embætti
rektors Háskóla Íslands. Kristín hefur unnið sér traust, virðingu og stuðning háskólafólks
og það er með mikilli gleði og bjartsýni sem ég við þessi tímamót afhendi
henni rektorsfestina sem er tákn samheldni og hugsjónar Háskóla Íslands.
Ég færi Kristínu mínar bestu óskir um farsæld í rektorsstarfi.
Megi gæfa fylgja henni og Háskóla Íslands.
Kristín Ingólfsdóttir:
Hlutverk Háskóla Íslands
Ræða við embættistöku rektors Háskóla Íslands
30. júní 2005
Forseti Íslands, forsætisráðherra, menntamálaráðherra, viðskiptaráðherra, frú
Vigdís Finnbogadóttir, fráfarandi rektor, fyrrverandi rektorar Háskóla Íslands,
rektorar annarra háskóla, kæra samstarfsfólk, góðir gestir.
I.
Ég þakka Páli Skúlasyni, fyrir hönd Háskóla Íslands, fyrir að leiða skólann styrkri
hendi á miklu uppbyggingarskeiði, þakka honum fyrir ósérhlífni og metnaðarfullt
og árangursríkt starf.
Ég vil jafnframt þakka Páli fyrir þann einlæga stuðning sem hann hefur sýnt mér
við þessi rektorsskipti. Við háskólafólk eigum í Páli sannan vin og traustan og
það er okkur ómetanlegt.
II.
Við þessi tímamót er hollt að íhuga hlutverk Háskóla Íslands í samfélaginu.
Háskóli Íslands er einstök stofnun, tíu þúsund manna kröftugt samfélag vísindamanna,
kennara, nemenda og annarra starfsmanna. Hér um bil aldarlöng saga
Háskólans er samofin sjálfstæðissögu Íslands og sjálfsmynd, samofin uppbyggingu
þekkingarsamfélags og vegferð þjóðarinnar frá fátækt til bjargálna.
Það hefur verið gæfa þjóðarinnar að leiðtogar hennar hafa skilið að háskólastarfið
er langtíma uppbyggingarstarf og árangur er best tryggður ef myndarlega er staðið
að starfseminni og þekkingarleitin innan veggja háskólans er óbundin og óheft.
Háskóli Íslands hefur verið og er helsta vísindastofnun þjóðarinnar. Skólinn hefur
menntað þúsundir Íslendinga á fjölmörgum fræðasviðum og þannig hefur hann
með vísindastarfi og menntun byggt upp hjá þjóðinni þekkingu sem er henni
sannkölluð auðlind.
Með elju og metnaði hafa íslenskir vísindamenn náð afburðaárangri í mörgum
fræðigreinum. Þessi árangur endurspeglast í sumum tilfellum í því að Ísland er á
alþjóðavettvangi talin þungamiðja viðkomandi fræða. Slíkur árangur skapar okkur
sérstöðu og samkeppnisforskot.
Háskóli Íslands hefur jafnframt lagt af mörkum til alþjóðasamfélagsins og auðgað
heimsmenningu með því að taka á móti erlendum stúdentum, bæði í grunnnám
og framhaldsnám. Kennarar frá Háskólanum hafa jafnframt farið utan og kennt
sérhæfð námskeið fyrir erlenda doktorsnema.
262