36164_Árbók 2005 - Háskóli Íslands

landic On-line er þróað á vegum Háskóla Íslands í samstarfi Stofnunar Sigurðar
Nordals, íslenskuskorar Háskóla Íslands, Hugvísindastofnunar Háskóla Íslands,
fimm evrópskra háskóla og háskólans í Wisconsin í Bandaríkjunum.
Þriðju verðlaun hlaut verkefnið Samspil gæðaþátta, fasteignaverðs og verðbólgu,
sem var lagt fram af Ásdísi Kristjánsdóttur og Ásgeiri Jónssyni. Nákvæmni við
mælingar á vísitölu neysluverðs skiptir gríðarmiklu máli þar sem flest íslensk lán
eru verðtryggð og Seðlabanki Íslands hefur sérstakt tölulegt verðbólgumarkmið
sem miðast við vísitölu neysluverðs. Niðurstöður umfangsmikilla rannsókna á
fasteignamarkaðnum Reykjavík og tölfræðigreiningar á 16.000 kaupsamningum í
meistararitgerð Ásdísar Kristjánsdóttur benda til þess að hugsanlega séu núverandi
viðmið ekki nægjanlega góð. En ljóst er að skekkja í mælingum getur leitt af
sér milljarðatap fyrir heimilin í landinu vegna ofáætlaðra verðtrygginga. Niðurstöður
verkefnisins eru afar hagnýtar og munu væntanlega leiða til meiri nákvæmni
í verðbólgumælingum hérlendis sem ættu að nýtast þeim aðilum sem
með málið fara, s.s. Hagstofu Íslands og Seðlabankanum.
Samkeppnin Uppúr skúffunum var nú haldin í sjöunda sinn. Í máli háskólarektors
kom fram að unnið hefur verið með mörg þeirra verkefna sem hafa verið verðlaunuð.
Fimm af sex hugmyndum sem hafa fengið fyrstu verðlaun hafa fundið sér
farveg í sprotafyrirtækjum og af þeim eru þrjú sprotafyrirtæki sem talsverðar
vonir eru bundnar við. Rektor gat þess að þau sprotafyrirtæki sem stofnuð hafa
verið síðustu árin hafa látið Háskóla Íslands fá nokkurn eignarhlut, sem viðurkenningu
á því framlagi sem aðstaða og allt umhverfi hefur lagt af mörkum til að
gera hugmynd að veruleika.
Þrír doktorsnemar hlutu viðurkenningar úr Verðlaunasjóði
Bergþóru og Þorsteins Scheving Thorsteinssonar
Verðlaunasjóður Bergþóru og Þorsteins Scheving Thorsteinssonar lyfsala veitti í
október í annað sinn viðurkenningar fyrir rannsóknir á sviði lyfjafræði. Að þessu
sinni voru verðlaunahafarnir þrír doktorsnemar í lyfjafræði við Háskóla Íslands,
þau Hákon Hrafn Sigurðsson, Sesselja Sigurborg Ómarsdóttir og Þórunn Ósk
Þorgeirsdóttir. Bent Scheving Thorsteinsson stofnaði sjóðinn í maí árið 2001 til
minningar um föður sinn Þorstein Scheving Thorsteinsson lyfsala í Reykjavíkurapóteki
og eiginkonu hans Bergþóru Patursson. Sjóðurinn er í vörslu Háskóla Íslands
og er ætlað að styrka vísindaleg afrek á sviði lyfjafræði, rannsóknir og
framhaldsnám í faginu.
Hákon Hrafn Sigurðsson lauk kandídatsprófi frá lyfjafræðideild Háskóla Íslands
árið 1999 og hóf doktorsnám 2001 undir leiðsögn Þorsteins Loftssonar prófessors.
Rannsóknir Hákons snúa að því hvernig lyf fer inn í augað og dreifist þegar
þangað er komið, með það að markmiði að þróa nýja augndropa sem skila lyfjum
betur inn í auga en almennt þekkist í dag.
Sesselja Sigurborg Ómarsdóttir lauk kandídatsprófi frá lyfjafræðideild Háskóla Íslands
árið 2000 og hóf doktorsnám haustið 2001 á sviði lyfja- og efnafræði náttúruefna
undir leiðsögn Elínar Soffíu Ólafsdóttur dósents. Doktorsverkefni Sesselju
felst í því að einangra og ákvarða byggingu fjölsykra úr íslenskum fléttutegundum
og kanna áhrif þeirra á hina ýmsu þætti ónæmiskerfisins með það að
meginmarkmiði að finna tengsl milli byggingar þeirra og verkunar.
Þórunn Ósk Þorgeirsdóttir lauk kandídatsnámi frá lyfjafræðideild Háskóla Íslands
vorið 2000 og hóf doktorsnám haustið 2000 undir leiðsögn Þórdísar Kristmundsdóttur
prófessors. Doktorsverkefni Þórunnar felst í rannsóknum á fitusýrum og
mónóglýseríðum sem sýnt hafa veiru-, bakteríu- og sveppadrepandi eiginleika en
markmið verkefnisins er að hanna stöðugt og virkt lyfjaform til meðferðar á húð
og slímhúðarsýkingum.
Þorsteinn Scheving Thorsteinsson var lyfjafræðingur og apótekari í Reykjavíkurvíkurapóteki
frá því hann lauk námi 1918 og fram til ársins 1962. Hann var einn af
stofnendum Lyfsalafélags Íslands sem síðar varð Apótekarafélag Íslands og formaður
Félags íslenskra lyfjafræðinga um hríð. Þorsteinn var velgjörðarmaður
Háskóla Íslands, stofnaði meðal annars styrktarsjóð við skólann í minningu foreldra
Þórunnar og Davíðs Scheving Thorsteinssonar árið 1940 og gaf Háskólanum
kortasafn sitt, sem prýðir fundarstofu háskólaráðs í Aðalbyggingu skólans. Þá
prýða fágætir munir úr Reykjavíkurapóteki húsnæði lyfjafræðideildar í Haga við
Hofsvallagötu. Þeir voru fluttir þangað úr húsnæði apóteksins í Austurstræti þegar
Háskólinn lagði niður rekstur þess og seldi húsnæðið. Margir þessara muna
bera fagurt vitni um stórhug og fagmennsku apótekaranna í Reykjavíkurapóteki á
fyrri hluta síðustu aldar.
24