36164_Árbók 2005 - Háskóli Íslands

Samskipti Landsbókasafns og Háskóla Íslands
Landsbókasafn Íslands - Háskólabókasafn er skilgreint í lögum sem „sjálfstæð
háskólastofnun með sérstaka stjórn og heyrir stjórnarfarslega undir menntamálaráðherra“.
Í grein um hlutverk og markmið safnsins er sagt að það sé „þjóðbókasafn
og bókasafn Háskóla Íslands. Safnið er rannsóknarbókasafn sem skal
halda uppi ávirkri og fjölþættri upplýsingaþjónustu á sviði vísinda og fræða,
stjórnsýslu og atvinnulífs“. Háskóli Íslands og safnið eiga þannig mikilla sameiginlegra
hagsmuna að gæta.
Hinn 18. ágúst 2004 var undirritaður samstarfssamningur milli Landsbókasafns
og Háskólans varðandi ýmsa þætti þar sem hagsmunir stofnananna tveggja liggja
saman. Samkvæmt samningnum eru helstu markmið hans fjögur:
• Að vinna að uppbyggingu safnsins sem þekkingarveitu bæði almennt og á
sérhæfðum sviðum í samráði við deildir Háskólans. Í því skyni er lögð sérstök
áhersla á rafrænar áskriftir og rafræna miðlun upplýsinga.
• Að tryggja aðgang nemenda og starfsfólks Háskólans að fræðilegu efni án
tillits til búsetu.
• Að tryggja öfluga notendafræðslu sem miði að upplýsingalæsi háskólanema
og nái til allra deilda HÍ
• Að styrkja safnið sem rannsóknarstofnun á sviði bókfræði og bókasafns- og
upplýsingafræði, m.a. í samvinnu við bókasafns- og upplýsingafræðiskor félagsvísindadeildar
HÍ
Fyrstu samráðsfundir samstarfsnefndar voru haldnir á árinu en í nefndinni sitja
Þórður Kristinsson, framkvæmdastjóri akademískrar stjórnsýslu og Sigrún Klara
Hannesdóttir, landsbókavörður. Til umræðu voru ýmis samskiptamál stofnananna
svo sem afgreiðslutími safnsins, staða ritakaupamála, stefnumótun í málefnum útibúa,
aðgangur annarra en nemenda HÍ að neti RHÍ svo dæmi séu tekin.
Af öðrum tengslum milli stofnananna má nefna að tveir stjórnarmenn safnsins
koma frá Háskóla Íslands og landsbókavörður á sæti á háskólafundum. Árið 2005
voru haldnir þrír háskólafundir þar sem rædd voru mál sem ættu að snerta aðgengi
háskólasamfélagsins að upplýsingum og bókasafnsþjónustu. Má þar nefna að rætt
var um gæði meistara- og doktorsnáms við HÍ, um stefnumál Háskólans og einnig
voru kynntar þrjár úttektarskýrslur sem unnar hafa verið um starfsemi Háskólans.
Athygli vekur að bókasafn og upplýsingaþjónusta eru ekki nefnd í neinni af þessum
skýrslum sem undirstaða undir rannsóknir, framhaldsnám og doktorsnám.
Samstarf háskólabókavarða
Bókaverðir á háskólabókasöfnum landsins hittast reglulega til að ræða sameiginleg
málefni. Alls eru þetta 12 aðilar frá 10 stofnunum, þ.e. frá Kennaraháskóla Íslands
(2), Háskólanum á Akureyri (2), Háskólanum í Reykjavík, Listaháskólanum í
Reykjavík, Landspítala-háskólasjúkrahúsi, Tækniskólanum, Bifröst, Hvanneyri og
Hólum auk landsbókavarðar. Á árinu voru haldnir þrír samráðs- og upplýsingafundir.
Á fyrsta fundi kynnti Landsbókasafn tvö af verkefnum safnsins, þ.e. vefsöfnun
og stafræna þjóðbókasafnið. Á öðrum fundi var viðfangsefnið landssamningar
um rafræn tímarit og skipting á kostnaði á milli greiðenda. Á þriðja fundi
var rætt um landsaðgang að tímaritum, um rafræna upplýsingaþjónustu og
Skemmuna og Hlöðuna við Háskólann á Akureyri.
Listasafn Háskóla Íslands
Helstu verkefni og starfsemi
Helstu verkefni forstöðumanns og stjórnar Listasafns Háskóla Íslands er að
varðveita, byggja upp og kynna eftir föngum hina miklu og verðmætu listaverkaeign
safnsins, svo sem með sýningarhaldi, en einnig með mótun heildrænnar
stefnu í innkaupum nýrra verka, í samræmi við sérstöðu safns, safneign og
sýningaraðstöðu. Samkvæmt stofnskrá Listasafns Háskóla Íslands er það hlutverk
safnsins að sinna upplýsinga- og þjónustuhlutverki gagnvart þeim sem
stunda rannsóknir á íslenskri myndlistarsögu. Safnið hefur í samræmi við það
unnið að því á sl. árum að efla tengingu safns við rannsóknar- og kennsluumhverfi
Háskóla Íslands, m.a. við nýtt nám í listfræði við hugvísindadeild. Safnið var
stofnað árið 1980 í tilefni stórrar listaverkagjafar Ingibjargar Guðmundsdóttur og
Sverris Sigurðssonar og fagnaði það því 25 ára afmæli árið 2005.
Sýningarhald
Verk úr eigu Listasafns Háskóla Íslands er nú að finna á 32 stöðum innan háskólasamfélagsins
og er skipt um uppsetningar reglulega.
242