36164_Árbók 2005 - Háskóli Íslands

Alþjóðlegur sumarskóli
Frá því árið 2003 hefur Rannsóknasetur um smáríki hefur starfrækt sumarskóla
um smáríki og Evrópusamrunann í samstarfi við 11 erlenda háskóla og með árlegum
styrk frá Evrópusambandinu. Þetta er þverfaglegt námskeið sem stendur í
tvær vikur og er haldið á ensku. Námskeiðið sem haldið var 2005 leiddi að venju
saman bæði íslenska og erlenda nemendur og kennara. Að jafnaði hafa um átta
heimsþekktir fræðimenn á sviði smáríkjarannsókna og Evrópumála séð um
kennsluna og 15-20 erlendir stúdentar hvaðanæva að frá Evrópu hafa sótt námskeiðið
auk fjölda íslenskra stúdenta.
Vefnámskeið
Allir fyrirlestrar á sumarskólanum eru teknir upp, unnir sérstaklega og birtir á
netinu. Samstarfsskólar Smáríkjasetursins geta nýtt sér þessa fyrirlestra bæði til
að bjóða nemendum sínum upp á námskeið sumarskólans í heild sinni eða notað
einn og einn fyrirlestur í námskrá sinni. Þessir rafrænu fyrirlestrar hafa þegar
verið notaðir með góðum árangri í kennslu í stjórnmálafræði í félagsvísindadeild
HÍ. Vefnámskeiðið er í stöðugri þróun og er uppfært á hverju ári með nýjum fyrirlestrum.
Útgáfa
Mikil áhersla er lögð á rannsóknir og útgáfu fræðirita og frá því að Alþjóðamálastofnun
var endurskipulögð hafa verið gefnar út sex bækur. Á síðasta ári var
grunnurinn lagður að útgáfu þriggja bóka sem koma út í ár.
• Bók um íslenska utanríkisstefnu frá lokum kalda stríðsins með greinum eftir
15 íslenska fræðimenn.
• Bók um alþjóðamál með greinum eftir unga fræðimenn þar sem lögð er
áhersla á tengsl stjórnmála, hryðjuverka, stríða, mannréttinda og alþjóðahagkerfisins.
• Yfirlitsrit um helstu fræðitexta í smáríkjafræðum undir ritstjórn Christine Ingebritsen,
starfandi rektors Washingtonháskóla í Bandaríkjunum sem jafnframt
situr í stjórn Alþjóðamálastofnunar.
Aukinn kraftur var settur í ritröð Smáríkjasetursins á síðasta ári og ný ritstjórn
tók við stjórnartaumunum. Í ritstjórninni sitja sjö virtir fræðimenn á sviði smáríkjarannsókna,
þau Anders Wivel frá Kaupmannahafnarháskóla, Annica Kronsell frá
háskólanum í Lundi, Clive Archer og Neill Nugent frá Manchester Metropolitan
háskóla, Iver B. Neumann frá norsku Alþjóðamálastofnuninni, Lee Miles frá Liverpool
háskóla og Richard T. Griffiths frá háskólanum í Leiden í Hollandi.
Önnur verkefni
Stofnanirnar hafa á síðasta ári sinnt afar fjölbreyttum verkefnum. Má þar nefna
m.a. að í samstarfi við bandaríska sendiráðið var unnið að því að koma upp yfirgripsmiklu
bókasafni um öryggis- og varnarmál sem hýst verður í Þjóðarbókhlöðunni
en stefnt er að sams konar bókasafni um smáríkjafræði. Þá hefur Alþjóðamálastofnun
tekið þátt í fjölda fyrirlestra og málþinga og sendi til dæmis íslenska
fræðimenn á ráðstefnu í Líbanon í október 2005. Heimasíða stofnananna
var endurbætt á síðasta ári og unnið er að uppbyggingu á verkefnabanka með
rannsóknum mastersnema í hinu nýja alþjóðasamskiptanámi. Þegar hefur verið
tryggður rannsóknastyrkur frá Samtökum iðnaðarins fyrir mastersverkefni sem
tengist ESB og íslensku atvinnulífi.
Háskólasetrið á Hornafirði
Almennt
Háskólasetrið á Hornafirði er rannsókna- og fræðasetur Háskóla Íslands á Suðausturlandi.
Háskólasetrið tók til starfa vorið 2002 með ráðningu forstöðumanns.
Hingað til hefur rekstur háskólasetursins grundvallast á samstarfssamningi milli
Háskóla Íslands, Vegagerðarinnar, Sveitarfélagsins Hornafjarðar, Landsvirkjunar,
Siglingastofnunar og Veðurstofunnar. Upphaflegur samningur þessara aðila var til
þriggja ára og var endurnýjaður til eins árs í desember 2004. Háskólasetrið fékk
með tilstyrk sveitafélagsins Hornafjarðar fjárveitingu að upphæð 7 m.kr. á fjárlögum
2006. Háskólasetrið er til húsa í mennta- og menningarsetri Hornfirðinga,
Nýheimum. Háskóli Íslands á þar eigið húsnæði, alls 62,5 m 2 , og eru þar þrjár
skrifstofur.
Stjórn og starfsfólk
Stjórnarformaður Háskólasetursins á Hornafirði er Rögnvaldur Ólafsson, eðlis-
194