36164_Árbók 2005 - Háskóli Íslands

sambönd (Polycyclic aromatic hydrocarbons) eru tekin upp af lífverum. Markmið
með þessum rannsóknum var að afla samanburðargagna vegna rannsókna nærri
olíuborpöllum í Norðursjó og víðar.
Ástæður mikils fugladauða í Eystrasalti. Undanfarin ár hefur orðið vart mikils
fugladauða í Eystrasalti. Hér er um að ræða mjög víðtækt vandamál, sem tekur til
fjölmargra tegunda fugla. Enn er óljóst hvað veldur þessum dauða. Dr. Lennart
Balk, ITM, háskólanum í Stokkhólmi, leiðir rannsóknir sem beinast að því að
kanna hvað veldur þessu og eru margvísleg mengandi efni mæld í mörgum
fuglategundum, auk þess sem lífeðlisfræðilegir og lífefnafræðilegir þættir eru
metnir. Mikilvægt er við rannsóknir sem þessar að hafa góð samanburðargögn
frá svæðum, þar sem svona lagað er óþekkt. Í ljósi þessa valdi Balk að nýta íslenska
fugla til samanburðar. Balk og þrír samstarfsmenn hans dvöldust því í
rúman mánuð í Háskólasetri Suðurnesja og öfluðu sýna úr íslenskum eggjum.
Sýnin voru send til Svíþjóðar, þar sem unnið var frekar úr þeim. Þessi sýnataka
var gerð í samstarfi við Gunnar Þór Hallgrímsson og Jörund Svavarsson.
Farhættir sendlinga. Vorið 2005 fóru fram rannsóknir á sendlingum á Rosmhvalanesi
á vegum Gunnars Þórs Hallgrímssonar í samvinnu við dr. Ron W. Summers
og Highland Ringing Group í Skotlandi. Markmið rannsóknanna var að kanna farhætti
hjá langnefjuðum stofni sendlinga sem hefur vetursetu í Vestur-Evrópu en
virðist nota Ísland sem áfangastað á leið til ókunnra varpstöðva.
Vernduð svæði í sjó við Ísland. Sigríður Kristinsdóttir MS nemi. Verkefnið er unnið
í samvinnu við Náttúrustofu Reykjaness og Svein Kára Valdimarsson, forstöðumann.
Áhrif tófu á varphætti sílamáfs. Frá 2004 hefur Gunnar Þór Hallgrímsson unnið að
doktorsverkefni sínu sem snýr að tófu og sílamáfi. Verkefnið er samstarf Líffræðistofnunar
Háskólans, Náttúrustofu Reykjaness, Háskólaseturs Suðurnesja og
Náttúrufræðistofnunar Íslands. Rannsóknin snýst um að kanna hvað veldur því að
tófan hefur áhrif á útbreiðslu sílamáfsins á Miðnesheiði og athuga hvort tófan geti
einnig haft áhrif á þéttleika og/eða stofnstærð þeirra.
Tilraunir með bóluefni, á vegum Bjarnheiðar Guðmundsdóttur, Sigríður Guðmundsdóttur
og Bryndísar Björnsdóttur, Tilraunastöð Háskóla Íslands í meinafræði
að Keldum.
María B. Steinarsdóttir, sjávarlíffræðingur, vann hluta úr árinu í Háskólasetri Suðurnesja.
Rannsóknirnar, sem voru samstarf Háskólasetursins, Náttúrustofu
Reykjaness og Líffræðistofnunar Háskólans, fólust í kortlagningu á fjörum
Reykjaness.
Háskóli Íslands í
Vestmannaeyjum
Samstarfsnefnd Háskóla Íslands og Vestmannaeyjabæjar rekur Rannsókna- og
fræðasetur Vestmannaeyja (Setrið) sem er til húsa á Strandvegi 50 í Vestmannaeyjabæ.
Setrið hefur aðstöðu á annarri og þriðju hæð sem eru alls 634 m 2 sem
skiptast í séraðstöðu (240 m 2 ) og sameiginlega aðstöðu (393 m 2 ).
Setrið var formlega opnað í október 1994 og var það fyrsta fræðasetur Háskóla Íslands
á landsbyggðinni. Setrið í Eyjum hefur síðan verið fyrirmynd margra annarra
fræðasetra á landsbyggðinni. Í Setrinu sameinast undir einu þaki þær stofnanir
í Vestmannaeyjum sem starfa að grunnrannsóknum, hagnýtum rannsóknum,
gagnasöfnun og nýsköpun í atvinnulífinu, ásamt því að gera ýmsar þjónustumælingar
fyrir opinbera aðila og fyrirtæki. Í Setrinu er einnig miðstöð fullorðinsfræðslu
og fjarkennslu á háskólastigi. Nú eru í Setrinu auk Háskóla Íslands Hafrannsóknastofnun,
Heilbrigðiseftirlit Suðurlands, Náttúrustofa Suðurlands, Rannsóknastofnun
fiskiðnaðarins, Rannsóknaþjónusta Vestmannaeyja, Svæðisvinnumiðlun
Suðurlands og VISKA, Fræðslu- og símenntunarmiðstöð Vestmannaeyja.
Hlutverk Setursins er að sinna rannsóknum og þróun á breiðu sviði sjávarútvegs
í samvinnu við atvinnulífið í Eyjum og að stunda rannsóknir á og safna
gögnum um náttúru Suðurlands. Einnig er því ætlað að stuðla að samvinnu við
200