36164_Árbók 2005 - Háskóli Íslands

Kynjahlutfall í nefndum, ráðum og stjórnum
Í jafnréttisáætlun 2005-2009 er kveðið á um að jafnréttisnefnd skuli á ári hverju
safna gögnum um kynjahlutfall í nefndum, ráðum og stjórnum og koma þeim
upplýsingum á framfæri. Á mynd 1. má sjá hvernig kynjahlutfallið greindist á árinu
2005.
Mynd 1.
Athygli vekur að konur eru aldrei í meirihluta í flokkuninni og hversu hallar á
konur í skipuðum dómnefndum. Dómnefndirnar eru bæði nefndir vegna nýráðninga
og framgangsmála.
Rannsóknir og útgáfa
Á árinu lét jafnréttisnefnd vinna rannsókn um brottfall karla í hjúkrunarfræðinámi.
Þórður Kristinsson, mannfræðingur, var fenginn til starfsins og leit afrakstur
vinnu hans dagsins ljós í október. Skýrslan, sem ber heitið Upplifun karla á
hjúkrunarnámi: Hvað stendur í vegi fyrir auknum hlut karla í hjúkrun? er tiltæk á
heimasíðu jafnréttisnefndar.
Á haustmánuðum var ákveðið að ráðast í útgáfu á Stefnu gegn mismunun. Áður
en það verk var unnið var stefnan þýdd á ensku og síðan gefin út í einum bæklingi,
bæði á íslensku og ensku.
Jafnréttisverðlaun Jafnréttisráðs 2005
Háskóli Íslands hlaut viðurkenningu Jafnréttisráðs, sem veitt var við hátíðlega athöfn
27. október. Kristín Ingólfsdóttir, háskólarektor, veitti viðurkenningunni móttöku
og þakkaði við það tækifæri öflugu jafnréttisstarfi innan Háskólans.
Málefni sam- og tvíkynhneigðra
Samstarf við FSS, félag STK – stúdenta, var með miklum ágætum á árinu. Félagið
tók þátt í uppskeruhátíð jafnréttismála í nóvember og fulltrúi frá félaginu kom
með kynningu á fund jafnréttisnefndar í desember. Á þeim fundi ákvað jafnréttisnefnd
að gerast stofnfélagi fræðslusjóðs FSS og styrkja hann um kr. 300.000. Sá
styrkur verður greiddur á næstu fjórum árum.
Málefni erlendra starfsmanna og nemenda
Í nóvember skilaði formaður starfshóps um málefni erlendra stúdenta og starfsmanna
skýrslu um starf hópsins, sem starfaði á árunum 2003–2004. Starfshópnum
var ætlað að gera faglega úttekt á stöðu erlendra námsmanna og starfsmanna
við skólann og setja fram tillögur til úrbóta. Einnig fékk hópurinn það
verkefni að móta tillögur um stefnu Háskólans í málefnum þeirra sem teljast til
minnihlutahópa við skólann sem þróaðist í stefnu gegn mismunun en fleiri aðilar
komu að þeirri vinnu. Meðal helstu niðurstaðna starfshópsins var að taka þurfi
betur á móti útlendum nemendum og starfsmönnum og að stórbæta þurfi
upplýsingaflæði til þeirra.
70