36164_Árbók 2005 - Háskóli Íslands

kaup á rekstrarvörum. Þá hefur innkaupakort ríkisins verið notað í vaxandi
mæli við innkaup.
Framkvæmdastjóri fjárreiðusviðs og deildarstjóri áætlanadeildar unnu með fjármálanefnd
háskólaráðs eins og áður. Nefndin vann með sviðinu að mörgum þeim
verkefnum sem hér hafa verið talin upp.
Framkvæmd kennslusamnings
Rektor og menntamálaráðherra undirrituðu 5. október 1999 samning um kennslu
og fjárhagsleg samskipti. Markmið Háskóla Íslands með samningnum er að tryggja
að fjárveitingar verði í takt við nemendafjölda og virkni nemenda í námi. Á árinu
2003 var óskað eftir endurskoðun á samningnum því virkir nemendur eru nú
fleiri en gert var ráð fyrir. Endurskoðaður samningur var undirritaður en ekki
tókst að tryggja að Háskóli Íslands fengi greitt fyrir alla nemendur sem þreyttu
próf við skólann.
Hinn 1. nóvember 2005 skilaði Háskóli Íslands kennsluuppgjöri vegna ársins 2005
í samræmi við kennslusamning. Þar kom fram að á háskólaárinu 2004-2005 voru
skráðir 8.725 nemendur við skólann. Virkni nemenda jókst og var að meðaltali
66,6% og virkir nemendur til uppgjörs vegna kennslu voru 5.807. Virkum nemendum
fjölgaði um 78 (1,4%) á milli ára. Á fjárlögum var aðeins reiknað með 5.450
virkum nemendum. Ekki fékkst greitt fyrir 321 nemanda sem samkvæmt reiknilíkani
hefði gefið háskólanum 203,3 m.kr. viðbótarfjárveitingu. Á síðustu 5 árum
hefur Háskóli Íslands skilað 23.627 virkum nemendum samanborið við 25.756
samkvæmt forsendum fjárlaga. Eftir standa 2.129 virkir nemendur sem ekki hefur
fengist greitt fyrir að fullu. Samkvæmt útreikningum nemur óuppgerð kennsla
759 m.kr. á síðustu 5 árum.
Launahækkanir og þá sérstaklega laun kennara hafa hækkað mun meira en
reiknilíkan vegna kennslu á háskólastigi tekur tillit til. Talið er að 400 m.kr. vanti á
fjárveitingu menntamálaráðuneytisins til þess að einingarverð vegna kennslu taki
mið af launþróun á háskólastiginu. Háskólinn hefur farið fram á að ráðuneytið
greiði kennslu allra nemenda skólans á einingarverði sem taki tillit til núgildandi
kjarasamninga og úrskurðar kjaranefndar um laun prófessora. Útgjöld vegna
kennslu námu 3.170 m.kr. og tekjur voru 513 m.kr. Þar af voru tekjur af skrásetningargjöldum
355 m.kr.
Rannsóknasamningur og önnur verkefni
Í desember 2003 var endurnýjaður samningur við menntamálaráðuneytið um
rannsóknir. Þrátt fyrir ákvæði í fyrri samningi um að árangurstengja fjárveitingar
til rannsókna náðist ekki samkomulag um það. Hlutur rannsóknarfjárveitingar
hefur því farið lækkandi og nægir ekki til þess að mæta rannsóknarkostnaði skólans,
sem meðal annars innifelur rannsóknarhluta kennaralauna. Útgjöld vegna
rannsókna og annarra verkefna námu 3.532 m.kr., sértekjur 1.644 m.kr. og fjárveiting
1.371,5 m.kr. Það vantar því 516 m.kr. upp á að fjárveiting og sértekjur
dugi fyrir útgjöldum.
Heildartölur um rekstur 2005
Fjárveiting á fjárlögum nam 4.269,2 m.kr. Til viðbótar komu fjárheimildir frá
menntamálaráðuneytinu vegna sérstakra verkefna að upphæð 55,7 m.kr. og
vegna launahækkana 181,8 m.kr., og úr ritlauna- og rannsóknarsjóði prófessora
komu 200,5 m.kr. í hlut prófessora við HÍ. Verulegur hluti þess var vegna uppgjörs
á dómsmáli. Samtals námu fjárheimildir 4.706,8 m.kr. og uxu um 11,5% frá fyrra
ári.
Greiðslur úr ríkissjóði á árinu námu 5.016,9 m.kr. og versnaði staða Háskóla Íslands
við ríkissjóð um 310,2 m.kr. og skuldaði Háskólinn ríkissjóði 884,9 m.kr. í
árslok. Ef skólinn fær að fullu greitt fyrir kennslu áranna 2001-2005 verður hægt
að jafna stöðuna við ríkissjóð.
Sértekjur námu alls 2.442,6 m.kr. samanborið við 2.299,3 m.kr. í fyrra. Sértekjur
jukust um 143,3 m.kr. eða 5,9%. Erlendar tekjur námu 399,3 m.kr. og lækkuðu um
26,1% fá fyrra ári. Innlendir styrkir voru 598,0 m.kr. og hækkuðu um 31,6%. Rekstrartekjur
alls hækkuðu um 9,6% og námu 7.149,4 m.kr. samanborið við 6.521,9
m.kr. árið 2004.
78