36164_Árbók 2005 - Háskóli Íslands

Nemendaskrá Háskólans er sá grunnur sem skipulag háskólastarfsins byggist á,
s.s. stundaskrár, skipan í stofur og bókakaup Bóksölu stúdenta. Þar fer fram
nýskráning, árleg skráning í námskeið og próf, innheimta skráningargjalds og varðveisla
einkunna. Skrifstofur deilda og námsbrauta eru tengdar tölvukerfi Nemendaskrárinnar
beint með tilteknum aðgangsmöguleikum, auk þess sem nemendaskrárkerfið
er beinlínutengt tölvukerfi LÍN. Í vefkerfi skólans, sem tekið var í notkun
á haustmisseri 2001, á hvert námskeið sína heimasíðu með dagatali, kennsluáætlun,
prófasafni og tilkynningum til nemenda. Að auki geta stúdentar nálgast margháttaðar
upplýsingar um námskeið sín og námsferil og geta þeir skráð sig úr námskeiðum
í vefkerfinu. Haldið var áfram endurskoðun nemendaskrárkerfis sem hófst
formlega haustið 2002, en átaksverkefni við endurskoðun gagnagrunns nemendaskrárkerfisins
var að mestu leyti lokið um áramótin 2004/2005.
Á árinu 2005 voru skráðar yfir 35.000 próftökur á þremur próftímabilum. Atvik utan
próftímabila voru um það bil 5.000. Ljóst er að fjölgun próftaka er umtalsverð
á milli ára, en beinn samanburður talna er varasamur þar sem margir þættir eiga
hlut að máli. Stöðupróf í ensku (TOEFL, Test of English as a Foreign Language)
voru haldin á vegum Háskólans samkvæmt samningi við Educational Testing
Service. Á árinu 2005 voru þau haldin fimm sinnum og samtals tóku 476 einstaklingar
stöðupróf. Þá voru haldin í fyrsta sinn svokölluð GRE og Gmat stöðupróf við
Háskólann og tóku 53 GRE prófið og 10 Gmat.
Fjöldi stúdenta og brautskráning
Í töflu 1 er að finna yfirlit yfir fjölda stúdenta við Háskóla Íslands háskólaárið
2004–2005 og fjölda brautskráðra árið 2005. Brautskráðir voru samtals 1.445, þar af
luku 250 meistaraprófi. Fimm doktorsvarnir fór fram í læknadeild á árinu, þrjár í
raunvísindadeild, tvær í hugvísindadeild, ein í lagadeild, tvær í tannlæknadeild, og
ein í félagsvísindadeild. Þá luku 125 viðbótarnámi (einu ári að loknu B.A.-/B.S.-prófi).
Gæðamat kennslu
Á vegum kennslumálanefndar hefur frá lokum haustmisseris 1987 verið leitað
eftir mati stúdenta á gæðum kennslu og námskeiða. Tilgangurinn er að veita
kennurum aðhald í kennslu og upplýsingar um hvað betur má fara. Kennslumiðstöð
Háskólans annast framkvæmd könnunarinnar í samráði við Reiknistofnun
og kennslusvið. Framkvæmd kennslukönnunarinnar og úrvinnsla er með rafrænum
hætti. Tekið er mið af könnuninni við framgang kennara.
Kennsluhúsnæði
Hin öra fjölgun stúdenta hefur kallað á aukið kennsluhúsnæði. Tekist hefur með
herkjum að hýsa kennsluna en ljóst er að hinn þröngi stakkur húsnæðis sem
kennslunni er víða sniðinn hefur neikvæð áhrif á kennslu og nám, svo og vinnutíma
kennara og stúdenta. Stundatöflur einstakra hópa eru tíðum sundurslitnar
og kennsla sett í óhentugt húsnæði eða nánast óhæft. Þá er með naumindum
unnt að koma skriflegum prófum fyrir á próftímabilum, einkum í desember, og
hefur þessi húsnæðisskortur iðulega áhrif á próftöflur nemenda til hins verra.
Á árinu 2005 voru lagðar niður tvær kennslustofur á annarri hæð Aðalbyggingar
og ein í Odda. Í staðinn voru teknar í notkun tvær kennslustofur í kjallara Aðalbyggingar
og leigt húsnæði undir kennslustofur í húsi Þjóðminjasafnsins og í
safnaðarheimili Neskirkju.
Kennslumálanefnd
Kennslumálanefnd fundaði 16 sinnum á árinu. Á vormisseri var m.a. rætt um
kennslukönnun, stigamat kennslu og sjúkra- og upptökupróf. Að venju var úthlutað
úr kennslumálasjóði, en 18 umsóknir bárust að þessu sinni og var samþykkt
að styrkja níu verkefni um samtals 5,6 m.kr. Á haustmisseri var rætt um
kennslukönnun, European Qualification Framework, úthlutunarreglur kennslumálasjóðs
og viðbrögð við niðurstöðum ytri úttekta á Háskóla Íslands.
Kennslumiðstöð
Hlutverk Kennslumiðstöðvar Háskóla Íslands er að stuðla að þróun kennsluhátta
við Háskólann með því að veita deildum, skorum og einstaka kennurum faglega
ráðgjöf og leiðbeiningar um þróun kennslu og kennsluhátta, hvort sem er á sviði
upplýsingatækni eða kennslufræði.
Kennslumiðstöð stendur fyrir vinnustofum, kynningum og námskeiðum tengdum
42