36164_Árbók 2005 - Háskóli Íslands

• Bologna promoters. Framkvæmdastjórn ESB veitti Alþjóðaskrifstofu fyrir
tímabilið 1. júlí 2005 - 31. desember 2006, 14.065 evru fjárframlag til að standa
straum af kostnaði við kynningu á Bologna-samræmingarferli háskóla í
Evrópu. Í samvinnu við menntamálaráðuneyti og Bologna-nefnd á Íslandi.
Fyrirhugað er að halda kynningarráðstefnu og fund um Bologna-ferlið hér á
landi á tímabilinu.
Starfsmanna- og
starfsþróunarmál
Á starfsmannasviði starfa Guðrún Jóhanna Guðmundsdóttir, starfsmannastjóri,
Elísabet Þorsteinsdóttir, verkefnisstjóri/starfsmatsstjóri, Lilja Þorgeirsdóttir, verkefnisstjóri,
Sólveig B. Gunnarsdóttir, lögfræðingur/verkefnisstjóri og Þóra Margrét
Pálsdóttir, sálfræðingur/verkefnisstjóri. Um mitt árið 2005 tók Sigrún Valgarðsdóttir,
verkefnisstjóri á starfsmannasviði, við starfi jafnréttisfulltrúa Háskóla Íslands
og í september kom Elísabet Þorsteinsdóttir, starfsmatsstjóri, til starfa við
starfsmannasvið. Jafnframt að sinna áfram starfsmatinu sér Elísabet um að uppfæra
starfsmannaskrá Háskólans og yfirfæra í HRM kerfi Oracle auk þess að
sinna ýmsum öðrum verkefnum, þ. á m. ráðningum. Starfsfólk sviðsins tekur að
sér fjölbreytt verkefni þannig að sá sem leitar til sviðsins á þess kost á að hafa
einn tengilið varðandi þau mál sem þarf aðstoð við, jafnvel þó ólík séu.
Starfsmenn sviðsins eru í nánu samstarfi við yfirmenn og unnið er að því að styðja
þá sem best og leitast sviðið við að finna leiðir sem henta hverjum og einum. Einnig
tekur starfsmannasvið þátt í að endurskoða störf og skipulagseiningar m.t.t. þeirra
krafna sem gerðar eru til stjórnsýslunnar. Mikið vinnuálag er á starfsfólki Háskólans
og leitar starfsmannasvið leiða til að draga úr vinnuálagi m.a. með því að einfalda
og endurskoða verkefni. Fyrir liggur að skrá og fara yfir alla ferla í stjórnsýslu
með það að markmiði að einfalda og skýra þá og samskipti á milli eininga.
Á árinu voru haldnir tveir stefnumótunarfundir hjá sviðinu, þar sem farið var yfir
helstu verkefni sviðsins, markmið og framtíðarverkefni. Tekin var í notkun gátlisti
og verklag vegna áfengismisnotkunar með það að markmiði að auðvelda starfsfólki
og yfirmönnum þeirra að takast á við vandann. Einnig voru gátlistar vegna
slysa og óhappa yfirfarnir í samvinnu við öryggisnefnd.
Háskólatorg
Starfsmannastjóri átti sæti í verkefnisstjórn vegna svokallaðs Háskólatorgsverkefnis.
Þar var unnið með starfsfólki við að skilgreina starfsemi þeirra starfseininga
sem flytjast í Háskólatorg og taka þarf tillit til við hönnun hússins. Einnig fól
verkefnið í sér að kortleggja það sem bæta má, bæði í verkferlum og í þjónustu
við nemendur, en með tilkomu háskólatorgs verður mögulegt að hafa miðlæga
þjónustu við nemendur á einum stað og því gullið tækifæri að endurskoða þá
starfssemi.
Starfsmannasamtöl, starfslýsingar
Árlega fylgir starfsmannasvið því eftir að starfsmannasamtöl fari fram. Boðið er
upp á fræðslu og aðstoð fyrir stjórnendur og starfsfólk til að undirbúa sig. Starfsmannasamtölin
eru, þegar vandað er til þeirra, mikilvægur vettvangur fyrir
starfsmenn og yfirmenn þeirra til að ræða samstarf, samvinnu, árangur og framtíðarsýn
í því augnamiði að efla starfsmanninn og starfseininguna. Í starfsmannasamtölum
á að fara yfir starfslýsingu og endurskoða markmið. Á vormisseri gekk
vel að framkvæma starfsmannasamtöl í stjórnsýslu- og tæknistörfum og skiptu
starfsmenn sviðsins einingum á milli sín sem þeir höfðu samband við og buðu
aðstoð og fræðslu við framkvæmd samtalanna. Það er misjafnt hversu hart þurfti
að ganga á eftir yfirmönnum til að framkvæma starfsmannasamtöl, en hjá flestum
er þetta orðinn fastur liður einu sinni á ári. Hjá akademískum starfsmönnum
eru starfsmannasamtöl ekki orðin jafn fastur liður og hjá starfsfólki í stjórnsýslu
en þær deildir sem taka þau hafa lýst yfir ánægju sinni með þann umræðuvettvang
sem þau skapa.
Auglýsingar og umsóknir
Á árinu fjölgaði auglýsingum á störfum við skólann, enda lítið ráðið undanfarin ár
vegna aðhaldsaðgerða. Auglýst var 61 akademískt starf og um þau sóttu 146 einstaklingar;
45 önnur störf voru auglýst og um þau sóttu 423 einstaklingar.
63