36164_Árbók 2005 - Háskóli Íslands

Málefni fatlaðra
Málefni fatlaðra við Háskóla Íslands hafa öðlast sérstakan sess. Vinna í málaflokknum
tekur mið af Stefnu í málefnum fatlaðra við Háskóla Íslands, sem samþykkt
var á háskólafundi í maí 2002 og Reglum um sértæk úrræði í námi við Háskóla
Íslands, sem samþykktar voru í háskólaráði í júní 2002. Starfshópur um
málefni fatlaðra var fyrst skipaður sem vinnuhópur undir jafnréttisnefnd í byrjun
árs 2002. Níu manna ráð um málefni fatlaðra var svo skipað frá 1. júlí 2002 til
þriggja ára. Endurskipað var í ráðið til þriggja ára frá 1. júlí 2005 og er það nú ein
af nefndum háskólaráðs. Ráðið skipa Sigrún Valgarðsdóttir, jafnréttisfulltrúi, sem
er formaður þess, María Dóra Björnsdóttir og Magnús Stephensen, fulltrúar
námsráðgjafar, Lilja Þorgeirsdóttir, fulltrúi starfsmannasviðs, Gísli Fannberg, fulltrúi
kennslusviðs, Ásdís Guðmundsdóttir, fulltrúi skrifstofustjóra, Valþór Sigurðsson
fulltrúi reksturs og framkvæmda, Rannveig Traustadóttir, fulltrúi FH og FP og
Vigdís Ebenezersdóttir, fulltrúi stúdenta. Ráðið hélt sjö fundi á árinu.
Í febrúar stóð ráðið fyrir námskeiðinu Að vinna með fötluðum. Um námskeiðið
sáu Berglind Rós Magnúsdóttir, jafnréttisfulltrúi, Rannveig Traustadóttir prófessor
og María Dóra Björnsdóttir námsráðgjafi. 15 manns sóttu námskeiðið og fékk það
góða umsögn þátttakenda. Í mars fékk Háskóli Íslands heimsókn starfshóps þriggja
ráðuneyta um aðgengismál í opinberum stofnunum en formaður ráðs um
málefni fatlaðra var ein þeirra sem tók á móti hópnum. Í starfshópnum eru fulltrúar
frá félagsmálaráðuneyti, heilbrigðis- og tryggingaráðuneyti og umhverfisráðuneyti.
Fengu þeir kynningu á aðgengismálum við HÍ, þar sem greint var frá
því sem hefur verið gert, hvað þyrfti að bæta og um forgangsröðun verkefna. Í
maí tók ráð um málefni fatlaðra á móti hópi hreyfihamlaðra stúdenta. Í hópnum
voru liðlega 40 manns frá Finnlandi, Austurríki og Íslandi, þar af um helmingur
þess í hjólastólum. Ráðið tók að sér að kynna Háskóla Íslands og þjónustu fyrir
fatlaða stúdenta hér. Hinir erlendu gestir voru á vegum Hins hússins og var
heimsókn til Háskólans hluti af dagskrá þeirra hérlendis.
Eitt af verkefnum ráðsins á árinu var útgáfa bæklingsins Háskóli fyrir alla: Aðgengi
og úrræði við Háskóla Íslands. Markmiðið með útgáfunni var að gera jafnréttisstarf
og þjónustu Háskólans sýnilegri og er markhópur bæklingsins allir
þeir sem búa við einhvers konar fötlun eða hömlun. Bæklingurinn var sendur til
námsráðgjafa allra framhaldsskóla á landinu á haustmisserinu. Í lok september
stóð ráð um málefni fatlaðra fyrir kynningu um málefni fatlaðra stúdenta við Háskóla
Íslands í Öskju. Meðal annars var bæklingurinn Háskóli fyrir alla: Aðgengi
og úrræði við Háskóla Íslands kynntur og fulltrúi Fortúnu, félags um málefni fatlaðra
stúdenta við HÍ, sagði frá starfsemi félagsins. Fjölmörgum var boðið til
kynningarinnar, bæði innan sem utan skólans og var hún einkar vel sótt.
Á haustdögum fékk ráð um málefni fatlaðra styrk úr háskólasjóði til aðgengisúttektar
á vef Háskóla Íslands. Fyrirtækið SJÁ sá um úttektina og lá skýrsla um aðgengið
fyrir í desember. Markmiðið með aðgengisúttektinni var að auðvelda að
gera vefinn aðgengilegan öllum hópum, óháð fötlun. Er þá lögð áhersla á að vefurinn
sé aðgengilegur fyrir blinda, sjóndapra, lesblinda, hreyfihamlaða, flogaveika
og greindarskerta. Í ljós kom að vefur Háskólans var að ýmsu leyti til fyrirmyndar.
Einhverjar lagfæringar þarf þó að ráðast í og í desember var það mál í athugun
hjá RHÍ. Í nóvember kom út skýrslan Háskólanám án heyrnar: Skýrsla um námsog
félagslega stöðu tveggja heyrnarlausra nemenda við Háskóla Íslands.
Skýrslan er eftir Kristjönu Mjöll Sigurðardóttur MA og var hún unnin fyrir ráð um
málefni fatlaðra. Markmiðið með henni var meðal annars að ráðið geti kynnt sér
stöðu heyrnarlausra nemenda við HÍ og hugað að aðgerðum í þágu heyrnarlausra
nemenda í kjölfar hennar.
Að beiðni rektors ákvað ráð um málefni fatlaðra að kalla saman tímabundinn
starfshóp til að huga að geðheilbrigðisáætlun Háskóla Íslands. Starfshópurinn er
skipaður Rögnu Ólafsdóttur, fulltrúa námsráðgjafar, Þóru Margréti Pálsdóttur,
fulltrúa starfsmannasviðs, Bertrand Lauth, fulltrúa læknadeildar, Gabríelu Zuilmu
Sigurðardóttur, fulltrúa félagsvísindadeildar, Jóhönnu Bernharðsdóttur, fulltrúa
hjúkrunarfræðideildar og Jóni Eggert Víðissyni og Ingibjörgu Þórðardóttur, fulltrúum
Maníu, félags fólks innan Háskóla Íslands með geðraskanir. Fyrsti fundur
hópsins var í desember og er stefnt að því að afrakstur starfshópsins líti dagsins
ljós með vorinu.
71