36164_Árbók 2005 - Háskóli Íslands

og stjórnun flugumferðar. Verkefnið getur leitt til þess að starfsumhverfi flugumferðarstjóra
muni gerbreytast. Nemendur í framhaldsnámi við verkfræðideild Háskólans
og MIT hafa tekið þátt í rannsóknarverkefninu og haft með sér náið samstarf.
Rektor býður starfsfólki til tónleika
Rektor Háskóla Íslands, Kristín Ingólfsdóttir, bauð starfsfólki Háskólans og mökum
til tónleika í Háskólabíói 24. september. Flytjendur voru Þóra Einarsdóttir
sópran, Gunnar Guðbjörnsson tenor, Anna Guðný Guðmundsdóttir píanóleikari og
Sigrún Eðvaldsdóttir fiðluleikari. Að tónleikunum loknum var boðið til haustfagnaðar
í Hátíðasal í Aðalbyggingu.
Rafrænn háskóli
Svokallað viðburðadagatal á vef HÍ er nú ein öflugasta leiðin til að kynna opna viðburði
(fyrirlestra, málþing, ráðstefnur o.fl.) sem skipulagðir eru á vegum eða í
samvinnu við Háskóla Íslands, enda vefurinn mjög fjölsóttur. Sem dæmi má
nefna að í septembermánuði sóttu vefinn að meðaltali 13.145 gestir á dag og í
þessum sama mánuði var jafnframt slegið nýtt aðsóknarmet, þann 5. september:
16.469 gestir. Þetta er um 30% meiri aðsókn að vef Háskóla Íslands en var á sama
tíma árið 2004.
Háskóli Íslands meðal þeirra sex stofnana sem veita besta
rafræna þjónustu
Þann 12. desember var haldinn kynningarfundur um úttekt á vefjum ríkis og
sveitarfélaga undir yfirskriftinni Hvað er spunnið í opinbera vefi? Í niðurstöðu úttektarinnar
kemur m.a. fram að Háskóli Íslands var meðal þeirra sex stofnana
sem taldar eru veita besta þjónustu þegar heildarniðurstöður úr úttektum á 246
vefjum voru bornar saman. Hvað innihald varðar var Háskólinn í fimmta sæti og í
því áttunda þegar nytsemi var metin.
Þetta er í fyrsta skipti sem úttekt af þessari stærðargráðu er gerð á Íslandi. Megintilgangurinn
er að fá heildstætt yfirlit yfir alla þá rafrænu þjónustu sem er í boði
hjá ríki og sveitarfélögum en einnig að auka vitund opinberra aðila um það hvar
þeir standa í samanburði við aðra og gefa betri hugmynd um möguleika og tækifæri
sem felast í rafrænni þjónustu.
Verkefnið hófst í maí og voru skoðaðir 246 vefir og þeir metnir með tilliti til rafrænnar
þjónustu, innihalds, nytsemi og aðgengis. Sjá ehf. vann verkefnið fyrir
forsætisráðuneytið og Samband íslenskra sveitarfélaga. Verkefnið er liður í stefnu
ríkisstjórnarinnar um upplýsingasamfélagið fyrir árin 2004-2007, Auðlindir í allra
þágu.
Ýmislegt efni um Háskóla Íslands er að finna á vef Háskólans, www.hi.is, og á
slóðinni: www2.hi.is/page/um_HI
Tölulegar staðreyndir um Háskólann er að finna á slóðinni:
www2.hi.is/page/stadtolur
30