36164_Árbók 2005 - Háskóli Íslands

Formáli
Árið 2005 var viðburðaríkt í sögu Háskóla Íslands. Allt starf skólans var metið
og árangurinn borinn saman við erlenda háskóla. Á miðju ári urðu rektorsskipti
og í kjölfarið hófst umfangsmikil stefnumótunarvinna Háskólans fyrir tímabilið
2006-2011.
Að frumkvæði menntamálaráðuneytisins og Háskólans sjálfs voru utanaðkomandi
sérfræðingar og stofnanir, innlendar og erlendar, fengnar til að meta rekstur
skólans, kennslu, rannsóknir og stjórnsýslu. Niðurstöðurnar úr þessu mati voru
birtar opinberlega. Stjórnsýslu- og fjárhagsúttekt Ríkisendurskoðunar sýndi að
rekstur Háskólans er hagkvæmur og að skólinn fer vel með fé. Árangur, mældur í
afköstum vísindamanna og kennara, er meiri en hjá sambærilegum erlendum
háskólum og á sama tíma er rekstur Háskóla Íslands ódýrari en hjá erlendum
samanburðarskólum. Úttekt á akademískri stöðu og rannsóknavirkni sýndi að
vísindamenn skólans skila miklu og góðu verki. Úttekt á vegum Samtaka
evrópskra háskóla (European University Association) sýndi að grunnstarfsemi
Háskólans er traust hvað varðar kennslu og stjórnun, árangur í vísindastarfi er
framúrskarandi í mörgum greinum og skólinn hefur góð alþjóðleg tengsl. Í matsgerðunum
komu einnig fram ýmsar ábendingar og hugmyndir um hvað hægt
væri að gera til að efla og styrkja Háskólann enn frekar.
Á miðju ári 2005 urðu rektorsskipti við Háskóla Íslands. Páll Skúlason lét af
embætti eftir 8 ára farsælt starf. Árbókinni fylgir ítarleg greinargerð um rektorstíð
Páls Skúlasonar.
Kristín Ingólfsdóttir, prófessor í lyfjafræðideild, var kjörin nýr rektor af háskólasamfélaginu
og tók við embætti 1. júlí við hátíðlega athöfn í Hátíðasal. Um haustið
hófst viðamikil vinna við stefnumótun Háskóla Íslands fyrir tímabilið 2006-2011
með þátttöku starfsmanna og stúdenta í öllum deildum og stjórnsýslu. Þessi
vinna byggði á þeirri meginforsendu að menntun og þekkingarsköpun á heimsmælikvarða
sé grundvöllur lífskjara og velsældar eins og best þekkist, forsenda
velgengni í alþjóðlegu samkeppnisumhverfi og að við getum skapað áhugaverðan
starfsvettvang á Íslandi fyrir okkar best menntaða og hæfileikaríkasta fólk.
Við lestur þessarar Árbókar og Ritaskrár sem fylgir, má ljóst vera að rannsóknaog
kennslustarf við Háskóla Íslands hefur aldrei verið fjölbreyttara og blómlegra
en nú. Þörfin fyrir menntun og þekkingarsköpun í samfélagi okkar hefur aldrei
verið meiri og Háskóli Íslands hefur brugðist við því með fjölgun námsleiða og
eflingu framhaldsnáms og rannsóknarstarfs, sem í vaxandi mæli fer fram í gagnvirkum
og gjöfulum tengslum við atvinnulífið og í samstarfi við erlenda háskóla.
Kristín Ingólfsdóttir
rektor Háskóla Íslands
5