36164_Árbók 2005 - Háskóli Íslands

Happdrætti Háskóla Íslands
Almennt
Happdrætti Háskóla Íslands (HHÍ) var stofnað með lögum árið 1933. Meginástæða
þess var að Alþingi hafði veitt heimild til að byggja yfir Háskóla Íslands þegar
fjárveiting fengist en veitti svo ekki fé til byggingarinnar. Fyrsti úrdráttur fór fram í
mars 1934 og er afmælið miðað við það ár. Happdrættið er eins og nafnið gefur til
kynna í eigu Háskóla Íslands og tilgangur þess er að afla fjár til húsbygginga
skólans, viðhalds þeirra og til tækjakaupa. Nær allar byggingar Háskólans hafa
verið reistar fyrir ágóða af rekstri happdrættisins.
Starfsfólk og stjórn
Háskólaráð kýs stjórn Happdrættis Háskóla Íslands. Á fundi háskólaráðs þann 6.
október 2005 var kosin ný stjórn fyrir HHÍ. Í stjórnina voru kosin Ebba Þóra
Hvannberg, dósent, Óskar Magnússon, forstjóri og Páll Hreinsson, prófessor. Á
fundi sínum þann 26. október var Páll Hreinsson kosinn formaður stjórnar. Í fráfarandi
stjórn áttu sæti Páll Skúlason, háskólarektor, formaður, Páll Hreinsson,
prófessor, og Þórir Einarsson, fyrrverandi ríkisáttasemjari. Forstjóri Happdrættisins
er Brynjólfur Sigurðsson. Rekstur HHÍ er þrískiptur og er rekstrarstjóri yfir
hverri rekstrareiningu. Árið 2005 var Guðmundur Bjarnason rekstrarstjóri flokkahappdrættis,
Róbert Sverrisson rekstarstjóri Gullnámu og Steinunn Björnsdóttir
rekstrarstjóri Happaþrennu. Stöðugildi í árslok 2005 voru þrjátíu. Höfuðstöðvar
HHÍ eru í Tjarnargötu 4 í Reykjavík en utan þeirra starfar fjöldi umboðsmanna
víðs vegar um landið.
Rekstrarafkoma og greiðslur til Háskóla Íslands
Rekstrartekjur HHÍ árið 2005 námu 3,6 milljörðum króna og jukust þær um 15%
frá árinu 2004. Lögum samkvæmt skal hagnaði HHÍ að frádregnu einkaleyfisgjaldi,
sem greitt er til ríkisins, varið til uppbyggingar Háskóla Íslands. Hagnaðurinn
rennur til nýbygginga, viðhalds fasteigna og lóða og til tækjakaupa. Framlag
úr rekstri HHÍ til Háskóla Íslands á árinu 2005 nam 895 m.kr. Það framlag skiptist
í beint peningalegt framlag og afborganir og vexti af lánum sem tekin hafa verið í
nafni HHÍ og hafa þegar runnið til framkvæmda við Háskóla Íslands. Beint peningalegt
framlag á árinu 2005 nam 255 m.kr. en afborganir og vextir af lánum
voru 640 m.kr.
Lagalegt umhverfi
Á árinu 2005 voru sett almenn lög um happdrætti hér á landi (lög nr. 38/2005).
Samkvæmt þeim er óheimilt að reka happdrætti hér á landi nema með leyfi ráðherra.
Tilgangurinn með ákvæðinu er að hamla gegn skaðlegum áhrifum á almenning
og að halda uppi allsherjarreglu (public order). Í Evrópu og reyndar einnig
í Vesturheimi eru í gangi málaferli vegna þess að ýmiss einkafyrirtæki á
happdrættismarkaði vilja ekki láta sér nægja sinn heimamarkað. Þau vilja einnig
geta selt á erlendum mörkuðum.
Eftirlit
Eftirlit með úrdráttum og vinningum í HHÍ er í höndum sérstaks happdrættisráðs
sem dómsmálaráðherra skipar. Í því áttu sæti árið 2005 Drífa Pálsdóttir, formaður,
Bryndís Helgadóttir og Fanney Óskarsdóttir. Til vara er Anna Sigríður Arnardóttir.
Ársreikningar
Happdrættis Háskólans eru endurskoðaðir í umboði ríkisendurskoðunar og birtast
þeir í ríkisreikningi.
Háskólaútgáfan
Stjórn og starfsfólk
Stjórn útgáfunnar skipa Magnús D. Baldursson, formaður, Guðrún Björnsdóttir og
Höskuldur Þráinsson. Starfsmenn eru þrír sem fyrr: Jón Bjarni Bjarnason, verkefnisstjóri,
sem hóf störf hjá útgáfunni á árinu, Jörundur Guðmundsson, forstöðumaður
og Kristinn Gunnarsson, framleiðslustjóri.
Almennt
Fjöldi útgefinna nýrra titla var rúmlega sjötíu annað árið í röð. Endurútgáfur voru
sjö, auk minni prentgripa og bæklinga fyrir yfirstjórn HÍ Aukin eftirspurn kom
fram á árinu eftir útgáfu doktorsritgerða sem útgáfan getur þó ekki þjónustað
nema að takmörkuðu leiti. Velta útgáfunnar jókst frá fyrra ári og sama máli gegnir
234