36164_Árbók 2005 - Háskóli Íslands

við Landspítala-Háskólasjúkrahús og dr. Kim Fleischer Michaelsen, prófessor
frá Danmörku. Andmælendur voru dr. Olle Hernell, prófessor frá Svíþjóð
og dr. Ibrahim Elmadfa, prófessor frá Austurríki.
Forkröfur fyrir nám í raunvísindadeild er stúdentspróf. Ekki er gerð krafa um
stúdentspróf af bóknámsbraut en til viðbótar stúdentsprófi gerir raunvísindadeild
kröfur um að stúdentsprófið innihaldi að lágmarki eftirfarandi fjölda eininga í einstökum
greinum: Stærðfræði 21 eining og raungreinar 30 einingar, þar af a.m.k. 6
einingar í eðlisfræði, 6 einingar í efnafræði og 6 einingar í líffræði. Þó er öllum
sem lokið hafa stúdentsprófi heimil innritun í nám til BS prófs í landfræði og
ferðamálafræði.
Skorti 8 einingar eða minna á að lágmarkskröfum hér að ofan sé fullnægt getur
raunvísindadeild engu að síður heimilað nemanda að innritast í nám við deildina
en henni er þá heimilt að setja skilyrði um að nemandinn ljúki námi í tilteknum
greinum sem á vantar sem fyrst eftir innritun í raunvísindadeild eða samhliða
námi sínu í deildinni.
Raungreinapróf frá Tækniháskóla Íslands, áður Tækniskóla Íslands, nægir til inngöngu
í raunvísindadeild til jafns við stúdentspróf, enda sé fullnægt skilyrðum um
lágmarkskröfur í einstökum greinum, sbr. hér að framan.
Allir sem lokið hafa þriggja ára háskólanámi til fyrstu háskólagráðu í hvaða grein
sem er uppfylla skilyrði til að innritast í raunvísindadeild.
Samkvæmt tölum um fjölda nemenda í deildinni í upphafi haustmisseris voru
þeir alls 931. Á sama tíma árið 2004 voru nemendur deildarinnar 934.
Fjöldi erlendra stúdenta við deildina fór vaxandi. Allmargir nemendur sóttu heils
árs námsbraut í jarðvísindum á ensku fyrir erlenda stúdenta, alls 10 námskeið í
jarðfræði (5), landfræði (1), ferðamálafræði (1) og jarðeðlisfræði (2), auk eins yfirlitsnámskeiðs
sem fellur undir allar greinarnar þrjár. Þetta nám miðast við tvö ár
í háskóla.
Rannsóknir
Um rannsóknir í deildinni er fjallað í kafla um Raunvísindastofnun Háskólans og
Líffræðistofnun Háskólans í Árbókinni. Rannsóknastofnun í næringarfræði var
komið á fót með samningi milli Háskóla Íslands og Landspítala-Háskólasjúkrahúss.
Starfsmenn deildar og stofnana hlutu fjölmarga rannsóknastyrki á árinu.
Í samstarfi við Eðlisfræðifélag Íslands stóð deildin fyrir fyrirlestraröð fyrir almenning
við ágæta aðsókn undir yfirskriftinni Undur veraldar. Haldnir voru alls 13
fyrirlestrar, fjórir á vormisseri og níu á haustmisseri.
Húsnæðismál
Ýmis vandamál steðja að hvað varðar húsnæði deildarinnar og stofnana hennar.
Skrifstofur kennara eru víða þröngar og illa búnar. Rannsóknarrými er mun þrengra
en gerist við erlenda rannsóknarháskóla og lítið sem ekkert rými fyrir aðstoðarmenn
og framhaldsnema. Við ráðningu nýrra kennara koma undantekningarlaust
upp vandamál er varða húsnæði og tækjabúnað. Aðstöðuleysi hamlar
þátttöku kennara og sérfræðinga deildarinnar í erlendum samstarfsverkefnum
svo sem Evrópuverkefnum. Á árinu var unnið að greiningu á framtíðarþörfum
deildarinnar fyrir húsnæði.
Lausnir á húsnæðismálum þarf að nálgast í nánu samráði við stofnanir deildarinnar.
Líffræðistofnun er alfarið í húsnæði Háskólans en Raunvísindastofnun á sitt
eigið húsnæði á Dunhaga 3 ásamt hluta Tæknigarðs. Líta verður á húsnæðið í
heild. Starfsemi þessara stofnana og deildarinnar er til húsa í mörgum byggingum.
Veruleg umskipti urðu á fyrra ári er náttúrufræðahúsið Askja var tekið í notkun
að fullu og batnaði þá verulega aðstaða líffræði, jarðeðlisfræði og jarð- og
landfræði en þar með var mest af þeirri starfsemi deildarinnar sem var utan háskólalóðar
komið á háskólasvæðið. Nokkrir kennarar eru með starfsaðstöðu á
rannsóknastofnunum atvinnuveganna og á Landspítala-háskólasjúkrahúsi.
Vandamál þeirra greina sem eru vestan Suðurgötu munu ekki leysast að fullu fyrr
en byggt verður nýtt hús. Ljóst er að leysa þarf hið fyrsta húsnæðisvanda matvælafræðiskorar.
155