36164_Árbók 2005 - Háskóli Íslands

Ný verkefni eru á döfinni í samstarfi við Techische Universität Wien um notkun á
þessum aðferðum við reikninga á náttúrulegu tvífasastreymi í gufukötlum. Nokkur
verkefni hafa verið unnin í samstarfi við VGK verkfræðistofu um kerfislíkön af
Kalina orkuverum.
Stofan hefur einnig verið virk við rannsóknir á varmafræðilegri líkanagerð í fiskiðnaði.
Doktorsverkefni um bestun á orkubúskap fiskiskipa til veiða á uppsjávarfiski
er í vinnslu við stofuna. Stofan hefur tekið þátt í verkefni á vegum Norræna
iðnaðarsjóðsins um bestun gæða við veiðar á uppsjávarfiski í samstarfi við Rannsóknarstofnun
fiskiðnaðarins. Einnig hafa minni verkefni verið skoðuð í samstarfi
við RF um notkun og meðferð á vökvaís. Samstarfsfyrirtæki við þessar rannsóknir
er sprotafyrirtækið Marorka ehf.
Einnig er stofan í samstarfi við útrásarfyrirtækin Enex hf og X-orku ehf. um greiningu
og reikninga á tvífasavökvakerfum og tengingu slíkra orkuvera við hitaveitur.
Sjálfstætt starfandi einstaklingar
– ýmis verkefni
Helgi Þór Ingason
Í janúar 2005 hélt Helgi Þór Jónsson erindi á hádegisfundi hjá Stjórnvísi (fyrrum
Gæðastjórnunarfélag Íslands), sem bar heitið Gæðastjórnun og Verkefnastjórnun.
Í sama mánuði sótti hann einnig málþing norrænna fræðimanna á sviði verkefnastjórnunar
og kynnti þar nýtt meistaranám í verkefnastjórnun við verkfræðideild
HÍ. Helgi Þór tók þátt í ráðstefnu um hugbúnaðargerð (SWDC-REK) í maí 2005 og
kynnti þar greinina The Traditional Project Plan - How is it Applicable to Software
Development. Hann var einnig í ritnefnd sömu ráðstefnu og las yfir greinar við
undirbúning ráðstefnunnar. Þá skrifaði hann grein í tímarit véla- og iðnaðarverkfræðinema
í maí 2005 með Hauki Inga Jónassyni og nefnist greinin Verður maður
óbarinn verkfræðingur. Helgi Þór sótti 19. alþjóðlegu heimsráðstefnu IPMA, Alþjóðasamtaka
verkefnastjórnunarfélaga, í Deli á Indlandi í nóvember 2005 og flutti
þar erindið Project Planning - A Prerequisite to Changing Plans. Meðhöfundur var
Gréta María Grétarsdóttir. Samhliða þessu þróaði Helgi Þór og framkvæmdastýrði
nýju meistaranámi í verkefnastjórnun við verkfræðideild, MPM (www.mpm.is),
sem hófst í september 2005.
Magnús Þór Jónsson
Eftirfarandi rannsóknarverkefni voru unnin undir stjórn Magnúsar Þórs Jónssonar
á árinu 2005:
1. Frumgreining bilana og galla – Össur hf., framleiðsla og vöruþróun:
Rúnar Unnþórsson, doktorsnemi, Bjarni Gíslason, meistaranemi og Tómas P.
Rúnarsson, fræðimaður, hafa unnið við verkefnið ásamt Magnúsi. Rannís, Rannsóknarsjóður
Háskóla Íslands og Össur hf. voru styrktaraðilar. Á árinu var unnið
við greiningu galla við fyrstu áraun, stífni- og hljóðþrýstibylgjumælingar og flokkun
bilana samkvæmt hefðbundnum aðferðum.
2. Ljósboga og rafskautalíkan, AEM - Arc Electrode Model:
Halldór Pálsson, dósent, Guðrún Sævarsdóttir, verkefnastjóri, Jon Arne Bakken,
prófessor við NTNU og Andreas Westermoen,doktorsnemi við NTNU, hafa unnið
við verkefnið ásamt Magnúsi. Á árinu var unnið við frekari þróun á ljósbogalíkani
ásamt tengingu við rafskautalíkan. Verkefnið er samstarfsverkefni við Sintef í
Noregi og styrkt af Rannís og norskum rannsóknarsjóðum.
3. Hönnun og líkanstudd bestun:
Hlynur Kristjánsson, meistaranemi, ásamt Fjólu Jónsdóttir, dósent, hafa unnið við
verkefnið ásamt Magnúsi. Á árinu var sett fram aðferð til að finna bestu pípuleið
fyrir tvífasa safnæðar fyrir jarðvarmaorkuver. Aðferðin var notuð við hönnun á
safnæðum orkuversins á Hellisheiði. Jafnframt var sett fram aðferð til að besta
hönnun á dælustöðvum og aðveituæðum.
185