36164_Árbók 2005 - Háskóli Íslands

Niðurstöður rannsókna sinna birta starfsmenn stofunnar í skýrslum Raunvísindastofnunar
sem og í innlendum og alþjóðlegum fagtímaritum.
Starfsmenn Stærðfræðistofu eiga öflugt samstarf á fræðasviðum sínum við fólk
víða um heim og algengt er að samstarfsmenn erlendis frá dvelji við stofuna til
að vinna að sameiginlegum rannsóknaverkefnum. Sérstaklega má geta þess að
tveir af starfsmönnum stofunnar, Þórður Jónsson og Lárus Thorlacius, eru þátttakendur
í samstarfsnetunum ENRAGE og Forces Universe á vegum Evrópusambandsins.
Stofan bar hitann og þungann af 24. Norræna stærðfræðiþinginu, sem jafnframt
var 1. Fransk-norræna stærðfræðiþingið og haldið var í Reykjavík í janúar síðastliðnum.
Í tengslum við þingið var á vegum stofunnar einnig ráðstefna í tvinnfallagreiningu
sem bar heitið Complex Days of the North.
Tveir af starfsmönnum stærðfræðistofu, Freyja Hreinsdóttir og Ragnar Sigurðsson,
stóðu að því að koma á laggirnar svokölluðu Reiknisetri. Það er vefsetur þar
sem kennd er tölvunotkun við lausn stærðfræðilegra verkefna; sjá vefslóðina
http://www.hi.is/reiknisetur/
Breytingar á starfsmannahaldi stofunnar á árinu urðu sem hér segir:
Ágúst Sverrir Egilsson kom til starfa sem sérfræðingur.
Freyja Hreinsdóttir lét af störfum sem sérfræðingur og hélt til kennarastarfa við
Kennaraháskóla Íslands.
Halldór I. Elíasson lét af störfum sem prófessor við stærðfræðiskor, en gegnir
áfram hlutastarfi við stofuna.
Jón Ragnar Stefánsson lét af störfum sem dósent við stærðfræðiskor og starfar
ekki lengur við stofuna.
Kristján Rúnar Kristjánsson lauk doktorsprófi og hélt til starfa við Nordita í Kaupmannahöfn.
Pawel Bartoszek lauk meistaraprófi.
Ragnar Sigurðsson lét af störfum sem vísindamaður við stofuna og fluttist í starf
prófessors við stærðfræðiskor.
Frekari upplýsingar um starfsfólk stærðfræðistofu og rannsóknaverkefni hennar
má finna á vefsíðunni http://www.raunvis.hi.is/Staerdfr/Staerdfr.html
Málstofa í stærðfræði hefur verið starfrækt á vegum stærðfræðistofu frá árinu
1975. Yfirleitt er þar haldinn einn fyrirlestur á viku, en fyrirlestrahald er stopulla
yfir hásumarið. Í málstofunni kynna starfsmenn stofunnar og aðrir vísindamenn á
svipuðum fræðasviðum rannsóknir sínar eða aðrar nýjungar í stærðfræði og
stærðfræðilegri eðlisfræði. Sérstaklega má geta þess að samstarfsmenn erlendis
frá halda þar iðulega fyrirlestra. Upplýsingar um málstofuna er að finna á
veffanginu http://www.raunvis.hi.is/Staerdfr/malstofa.html
Jarðvísindastofnun
Jarðvísindastofnun Háskólans hóf starfsemi 1. júlí 2004 með sameiningu Norrænu
eldfjallastöðvarinnar og jarðvísindahluta Raunvísindastofnunar Háskólans
samkvæmt samkomulagi sem menntamálaráðherra, Þorgerður Katrín Gunnarsdóttir,
Páll Skúlason, háskólarektor og Sigurður Helgason, aðstoðarframkvæmdastjóra
Norrænu ráðherranefndarinnar, undirrituðu í apríl það ár. Jarðvísindastofnun
er til húsa í Öskju, nýja náttúrufræðahúsi Háskólans. Markmið Jarðvísindastofnunar
er að vera metnaðarfull alþjóðleg rannsóknastofnun í jarðvísindum,
sem endurspeglar einstaka jarðfræði Íslands og þá þekkingu í jarðvísindum sem
byggst hefur upp hér á landi. Norrænum tengslum starfseminnar er viðhaldið
undir heitinu Norræna eldfjallasetrið og unnið er að eflingu annarra alþjóðlegra
tengsla. Jarðvísindastofnun heyrir undir Raunvísindastofnun en er stjórnunar- og
skipulagslega sjálfstæð innan þess ramma sem lög og reglur Háskóla Íslands
setja. Forstöðumaður Jarðvísindastofnunar er Ólafur Guðmundsson, jarðeðlisfræðingur,
en formaður stjórnar Stefán Arnórsson, prófessor.
161