De const van rhetoriken

98
Item van achten ouersleghen, Op d' Astrologie.
.j.
Alst eerstwaerf sciep al, God goddelic bedacht
Onder andere den meinsche ende tfirmament,
Gaf hy elcken proprieteit ende macht,
En den meinsche maeckte hy bouen al potent:
Onder zyn subiectie zoo elcken es bekent
Syn schapen ende orssen, voort alle dieren,
Hy schiep en maecktet al, dlam met tserpent,
Dus doet God alle dijnghen by mannieren.
ij.
Den meinsche diedt ter weereld al mach regieren
Es onderdanigh van dies de planete riet:
De planeten moeten haer huusen aeyhieren
Influentien en cirkelen, en die God, hogher niet
Den calculant by experientien, siet
Vten astren vele diueersche alteratien,
Tripliciteiten en reuolutien maken dbediet,
Mids aspecten, conionctien ende exaltatien.
iij.
Dat hoogheit ende macht hebben de constellatien
Ouer Gods creaturen naer tsconijnghs vraghe
Blijckt verre ende naer te menigher spacien,
Zonder heet en caud naeckte ons alle plage,
Dies schijnd de mane tsnachts, de zonne by daghe
Zy temperen elck anderen zoodt claer es beseuen,
Vvinter ende zomer commen bider astren behaghe,
Anders worden alle vruchten verdreuen.
Matthijs de Castelein, De const van rhetoriken