De const van rhetoriken

40.
14
Hier by segghick om dijns gheests verlichten
Ghy ionghe wichten, hoord by uwer gratie,
Het is cleen sake Refereynen beslichten,
Liedekens maken, of baladen dichten,
An de spelen leid de cracht ende de efficacie:
Al es ooc goed dicht, al dijn collatie,
Clijncken de woorden niet, wy verstékent.
Tmoet wel gheredent zijn, telcker spacie,
Tes dicht, maer nauwelic rethorike gherékent.
41.
O lustighe Rethorike plaisant ende schoone,
Ghedaeld uut tshemels throone, rein zuuer gheerde,
Al ditte, procedeerd van uwen persoone:
Dien ghy dy vulmaecktelic iond te loone
Es wel gheluckich hier vp deerde,
Gheen meinsche, en vulsprake dijn weerde
Dus swijghic voord-an van u te prijsene:
Tes tijd dat ick mijn eerste propoost anueerde
Om de ionghers dijn edel const tonderwijsene.
42.
Dus dan, ghy gaudweerdighe baroenen
Hoord mijn sermoenen coraieus ende blye,
Vvild ghy u tot deser const vercoenen,
Vveedt, waer ghy tpoinct met mueghd versoenen,
Al vueren en draeghd gheen cuenstenaers inuye,
En schaemdt u niet te vraghene tallen tye,
Leest historien, ende wild daer in gheüseerd terden,
Ouerloopt Vlaemsche gesten, studeerd poëtrye,
Hier by suldy al ghefautsoneert werden.
Matthijs de Castelein, De const van rhetoriken