De const van rhetoriken

192.
101
Vele deser Baladen stellick wijds en sijds,
Niet min vul profijts, profitigher dan tgheld:
Om dat ghy lien hebben saudt veel berijds,
Vele occupatien ende vele iolijts,
Om volghen de exempelen vueren ghesteld:
Om dat ghy hebben zaudt een spacieus veld,
En vinden hier een simpel, en daer een stranghe lesse:
Met elders te zouckene en werdt ghy niet ghequeld
Hier mueghdy blusschen al u verlanghenesse.
193.
Meesters die dees const eens deels veruijnghen,
Bewaren haer dijnghen ghecoferd, ghestopt:
Langh waerd eer de ionghers iet ontfijnghen,
Vvant zij en laten hem lien niet ontsprijnghen,
Ende en gheuen niedt, hoemen rond omme hemlien tropt.
Haren boezem es zoo vaste toe ghecnopt
Dat zij niemend en willen haer doctrinen docéren:
Sy en hooren niet watmer buuscht of clopt,
Daer om willick u lien metten minen stofféren.
194.
Nieuërs met en mueghen de Ionghers bet leeren
Dan dat zij hem keeren tot elcks compositie:
Veel lesen sal hem lien de const vermeeren,
Dies moeten zij alle Facteurs wel eeren,
Ende en draghen niemend sinistre suspicie.
Dus gheuic u lien ionghers thuwer officie,
Oodmoedigh te sine, dwelck elcks aduijs greid:
Vvant den leerare tuughd om schuwen dit vitie,
In hoouerdighe ziele en quam nooit wijsheid.
Matthijs de Castelein, De const van rhetoriken