De const van rhetoriken

v.
104
Niemend en wille buten sine officie gaen,
Noch sinistre suspicie laen, naer dwel betamen:
Alle dijnghen laedt in ons dispositie staen,
Haud de huere ghesedt die wy vueren namen:
Dees conste schuud tot harer vramen
Schimp en vilonye, als al omme gheblammeert fel,
Vvachtes u het ware deser const ter blamen:
Alle faueuren hebben wy ghepostponeerd snel,
Ende adpeel ghereserueerd wel.
Andere gelike Baladen. Vanden Chyrurgiens.
.j.
Spiegheld an myn dicht ghy Chyrurgienen
Die elcken dienen om God oft om gheld:
Een zake moet ic u lien vercombienen
Daer menigh meester met es ghequeld.
Een meester Chyrurgien zo hier werd ghespeld
Heeft viere aensichten, ghedaenten oft figueren,
Elck aensichte diueersch zoo hier werd verteld:
Dus steeckt hy hem zeluen als doet hy schoon cueren
In vele auentueren.
ij.
Zyn eerste aensichte es Gods ghelijcke:
Een churgien zonder zwijcke es als God bekent,
Vvanneer de ghequedste waend commen te versijcke
Duer smerte zynder wonden ende zwaer torment,
Alzo saen als den meester hem comt ontrent
Dijnckt hem God commende uter hooghster zalen,
Mids dat van hem ghesonde wachtt den patient:
Zo en mochte hem God niet bequamer ghedalen
Vten hemelschen palen.
Matthijs de Castelein, De const van rhetoriken